ନୂଆଦିଲ୍ଲୀ : ଦୁର୍ନୀତି ମାମଲାରେ ସିବିଆଇ ନିର୍ଦେଶକ ଆଲୋକ ବର୍ମାଙ୍କ ଭବିଷ୍ୟତ ସମ୍ବନ୍ଧରେ ନିଷ୍ପତ୍ତି ନେବା ଲାଗି ଉଦ୍ଦିଷ୍ଟ ଉଚ୍ଚକ୍ଷମତା ସମ୍ପନ୍ନ କମିଟିରୁ ସୁପ୍ରିମକୋର୍ଟ ପ୍ରଧାନ ବିଚାରପତି ରଞ୍ଜନ ଗୋଗଇ ବୁଧବାର ଓହରି ଯାଇଛନ୍ତି। ସିବିଆଇ ନିର୍ଦେଶକ ଭାବେ ବର୍ମାଙ୍କ ନିଯୁକ୍ତି କାଏମ ରଖିଥିବା ସାମ୍ବିଧାନିକ ପୀଠର ସଦସ୍ୟ ଥିବାରୁ ଗୋଗଇ ଏହି ପଦକ୍ଷେପ ଗ୍ରହଣ କରିଛନ୍ତି। ତାଙ୍କ ସ୍ଥାନରେ ବିଚାରପତି ଏ. କେ. ସିକ୍ରି ଉକ୍ତ କମିଟିର ସଦସ୍ୟ ରହିବେ। ଏ ନେଇ ପ୍ରଧାନ ବିଚାରପତି ନିଜେ ସିକ୍ରିଙ୍କୁ ମନୋନୀତ କରିଛନ୍ତି। ତିନି ଜଣିଆ ଏହି କମିଟିରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଏବଂ ସର୍ବବୃହତ ବିରୋଧୀ ଦଳର ନେତା (ଏହି ମାମଲାରେ କଂଗ୍ରେସ ନେତା ମଲ୍ଲିକାର୍ଜୁନ ଖଡଗେ) ମଧ୍ୟ ସଦସ୍ୟ ଅଛନ୍ତି। ମୋଦୀ କେନ୍ଦ୍ର ସରକାରଙ୍କ ପଦକ୍ଷେପର ଔଚିତ୍ୟ ବିଷୟରେ କମିଟିକୁ ଅବଗତ କରିବାକୁ ଉଦ୍ୟମ କରିଥିବା ବେଳେ କଂଗ୍ରେସ ଆଲୋଚନା ପାଇଁ ଅଧିକ ସମୟ ଲୋଡିଛି। ଏପରିକି ବର୍ମାଙ୍କୁ ଛୁଟିରେ ପଠାଇବା ନେଇ କେନ୍ଦ୍ରର ନିଷ୍ପତ୍ତିକୁ ବିରୋଧ କରି ଖଡଗେ ପୂର୍ବରୁ ସୁପ୍ରିମକୋର୍ଟରେ ଏକ ଆବେଦନ କରିଥିଲେ। ଏଭଳିସ୍ଥିତିରେ ବିଚାରପତି ସିକ୍ରି ହିଁ ବର୍ମାଙ୍କ ଭବିଷ୍ୟତ ଉପରେ ଚୂଡାନ୍ତ ନିଷ୍ପତ୍ତି ନେବେ।
