ଆଠଗଡ : ଆୟ ବହିର୍ଭୂତ ସମ୍ପତ୍ତି ଠୁଳ ଅଭିଯୋଗରେ ଆଠଗଡ ବିଡିଓ ପ୍ରଦୀପ କୁମାର ସାହୁଙ୍କ ଆଠଗଡ ବ୍ଲକ କାର୍ଯ୍ୟାଳୟ ଓ ସରକାରୀ କ୍ଵାର୍ଟର ସମେତ ଭୁବନେଶ୍ବର, ଖୋର୍ଦ୍ଧା ଓ ନୟାଗଡ ଅଞ୍ଚଳର ମୋଟ ୬ଟି ସ୍ଥାନରେ ବୁଧବାର ସକାଳୁ ଭିଜିଲାନ୍ସ ଚଢାଉ ହୋଇଛି । ଭିଜିଲାନ୍ସ ଡିଏସପି ମନୋରଞ୍ଜନ ପାଇକରାୟଙ୍କ ନେତୃତ୍ୱରେ ଗୋଟିଏ ୫ଜଣିଆ ଦଳ ବିଡିଓଙ୍କ ସରକାରୀ ଆବାସ ଏବଂ ଭିଜିଲାନ୍ସ ନିରୀକ୍ଷକ ସେକ୍ ଇମ୍ରାନଙ୍କ ନେତୃତ୍ୱରେ ଏକ ୪ଜଣିଆ ଦଳ ବ୍ଲକ କାର୍ଯ୍ୟାଳୟରେ ଚଢାଉ କରି ସକାଳ ୧୦ଟା ଠାରୁ ଅପରାହ୍ନ ୬ ଟା ପର୍ଯ୍ୟନ୍ତ ଯାଞ୍ଚ କରିଥିଲେ । ସରକାରୀ କ୍ଵାର୍ଟର ଚାବି ବିଡିଓଙ୍କ ପାଖରେ ଏବଂ ବିଡିଓ ସାହୁ ଭୁବନେଶ୍ବରରେ ଅନ୍ୟ ଏକ ଭିଜିଲାନ୍ସ ଦଳ ସହିତ ଥିବାରୁ ଏଠାରେ ତାଙ୍କ କ୍ଵାର୍ଟର ତାଲା ଭାଙ୍ଗି ଭିଜିଲାନ୍ସ ଦଳ ତଦନ୍ତ କରିଥିଲେ । ତେବେ ସରକାରୀ ଆବାସରେ ବିଡିଓ ପ୍ରାୟତଃ ରୁହନ୍ତି ନାହିଁ । ତେଣୁ ଉକ୍ତ କ୍ଵାର୍ଟରରୁ କୌଣସି ଆପତ୍ତିଜନକ ତଥ୍ୟ, ସାମଗ୍ରୀ ବା ଅନ୍ୟ କିଛି ମିଳିନଥିବା ଭିଜିଲାନ୍ସ ଅଧିକାରୀଙ୍କ ସୂତ୍ରରୁ ଜଣାପଡିଛି । ସେହିପରି ବ୍ଲକ କାର୍ଯ୍ୟାଳୟରେ ମଧ୍ୟ ବିଭିନ୍ନ କାଗଜପତ୍ର, କମ୍ପ୍ୟୁଟର ଏବଂ ବିଡିଓଙ୍କ ଟେବୁଲ ଡ୍ରୟାର ଆଦିରୁ ସେପରି କିଛି ବି ମିଳିନଥିବାରୁ ଭିଜିଲାନ୍ସ ଦଳ ଏଠାରୁ ଖାଲି ହାତରେ ଫେରିଥିବା ଜଣାପଡିଛି ।
Popular Categories
Previous article
Next article