ସମାଜ ଡିଜିଟାଲ ଡେସ୍କ: ଭାରତର ୩୦୦ କ୍ଷୁଦ୍ର ବ୍ୟାଙ୍କ ଉପରେ ରାନସମଓ୍ବେର ଆକ୍ରମଣ ହୋଇଛି। ଏହା ଫଳରେ ଏହି ବ୍ୟାଙ୍କଗୁଡ଼ିକର ଏଟିଏମ ଏବଂ ୟୁପିଆଇ ସେବା ବାଧାପ୍ରାପ୍ତ ହୋଇଛି। ଗ୍ରାହକମାନେ ଏଟିଏମଗୁଡ଼ିକରୁ ଟଙ୍କା ଉଠାଣ କରିପାରୁନାହାନ୍ତି। ୟୁପିଆଇ ଜରିଆରେ ଟଙ୍କା ନେଣଦେଣ ବି ହୋଇପାରୁନାହିଁ। ସି-ଏଜ ଟେକ୍ନୋଲୋଜି ପକ୍ଷରୁ ଯେଉଁ ବ୍ୟାଙ୍କଗୁଡ଼ିକୁ ଆଇଟି ସେବା ଯୋଗାଇ ଦିଆଯାଉଛି ସେହି ବ୍ୟାଙ୍କଗୁଡ଼ିକରେ ଏଭଳି ସମସ୍ୟା ଉପୁଜିଥିବା ସୂଚନା ମିଳିଛି। ଅନ୍ୟ ବ୍ୟାଙ୍କଗୁଡ଼ିକରେ ସେବା ସ୍ଵାଭାବିକ ରହିଛି।
ନେସନାଲ ପେମେଣ୍ଟ୍ସ କର୍ପୋରେସନ ଅଫ ଇଣ୍ଡିଆ (ଏନପିସିଆଇ) ପକ୍ଷରୁ ବୁଧବାର ରାତିରେ ଏକ ବିବୃତି ଜାରି କରାଯାଇ ଏ ସମ୍ପର୍କରେ ସୂଚନା ଦିଆଯାଇଛି। ସି-ଏଜ ଟେକ୍ନୋଲୋଜି ରାନସମଓ୍ବେର ଆକ୍ରମଣରେ କ୍ଷତିଗ୍ରସ୍ତ ହୋଇଥିବାରୁ ଏହାକୁ ଏନପିସିଆଇ ପରିଚାଳିତ ଖୁଚୁରା ନେଣଦେଣ ବ୍ୟବସ୍ଥାରୁ ଅଲଗା (ଆଇସୋଲେଟ) କରିଦିଆଯାଇଛି।
