ବୌଦ୍ଧ: ବୌଦ୍ଧ ଜିଲ୍ଲା ଅବକାରୀ ବିଭାଗ ପକ୍ଷରୁ ଶନିବାର ବୌଦ୍ଧ ବ୍ରିଜ ଛକ ନିକଟରେ ଏକ କାରରୁ ୩୦ କେଜି ଗଂଜେଇ ଜବତ କରାଯିବା ସହ ଦୁଇ ଅଭିଯୁକ୍ତଙ୍କୁ ଗିରଫ କରାଯାଇଛି। ମିଳିଥିବା ସୂଚନା ମୁତାବକ, ମନମୁଣ୍ଡା ଥାନା ଗୁନ୍ଦୁଲିଆ ଅଞ୍ଚଳରୁ ଚାରିଛକ ଅଞ୍ଚଳକୁ ଏକ କାର ଯୋଗେ ଗଂଜେଇ ଚାଲାଣ ହେଉଥିବା ଅବକାରୀ ବିଭାଗ ଖବର ପାଇ ଚଢଉ କରିଥିଲା। କାରକୁ ଯାଂଚ କରିବାରୁ ଗଂଜେଇ ମିଳିଥିଲା।
କାରରେ ଥିବା ଗୁନ୍ଦୁଲିଆ ଗ୍ରାମର କପିଳ ସିଂ( ୪୦) ଓ ଏରଡା ଗ୍ରାମର ଶ୍ରୀକୃଷ୍ଣ ବେହେରା( ୪୩)ଙ୍କୁ ଗିରଫ କରାଯାଇଛି। ଏନେଇ ଅବକାରୀ ବିଭାଗ ପକ୍ଷରୁ ଏକ ମାମଲା ରୁଜୁ କରି ଦୁଇ ଅଭିଯୁକ୍ତକୁ କୋର୍ଟ ଚାଲାଣ କରାଯାଇଛି। ଚଢଉରେ ଇନସ୍ପେକ୍ଟର ପ୍ରମୋଦ ବାଣୁଆ, ଏସଆଇ ସତ୍ୟନାରାୟଣ ପ୍ରଧାନ, ଏଏସଆଇ ପ୍ରିୟରଂଜନ କହଁର, ଅସିତ କୁମାର ପ୍ରଧାନ, ରେଣୁପ୍ରିୟା ଭୋଇ, ଅଂଜଳି ଅମାତ, ସତ୍ୟାନନ୍ଦ ମୁଖି, ପ୍ରଫୁଲ ଭୋକ୍ତା ସାମିଲ ଥିଲେ।
