ସମ୍ବଲପୁର: ସମ୍ବଲପୁର ପାନ୍ଥ ନିବାସଠାରେ ରଜ ମଉଜ ୨୦୨୪ ଉଦଘାଟିତ ହୋଇଯାଇଛି। ପାନ୍ଥନିବାସରେ ଠାରେ ୩ ଦିନିଆ ରଜମଉଜ କାର୍ଯ୍ୟକ୍ରମକୁ ପଯ୍ୟଟନ ବିଭାଗ କାର୍ୟ୍ୟାଳୟ ସମ୍ବଲପୁର ଓଏସଡି ହେମନ୍ତ କୁମାର ପ୍ରଧାନ ଉଦଘାଟନ କରିଥିଲେ। ଏହି ଅବସରରେ ହୁଳହୁଳି ଓ ଶଙ୍ଖ ବାଦ୍ୟ ପ୍ରତିଯୋଗିତା ଅନୁଷ୍ଠିତ ହୋଇଥିଲା। ଓଡ଼ିଶାର ସଂସ୍କୃତି ଓ ପର୍ବପର୍ବାଣୀକୁ ପ୍ରୋତ୍ସାହନ ଦେବା ପାଇଁ ଓଡ଼ିଶା ସରକାରଙ୍କ ପର୍ଯ୍ୟଟନ ବିଭାଗ ପକ୍ଷରୁ ପାନ୍ଥନିବାସରେ ଏହି କାର୍ଯ୍ୟକ୍ରମ ଅନୁଷ୍ଠିତ ହୋଇଛି।
୩ ଦିନ ବ୍ୟାପୀ ହେବାକୁ ଥିବା ଉତ୍ସବକୁ ପାନ୍ଥନିବାସର ପରିଚାଳକ ସନ୍ତୋଷ କୁମାର ସାମନ୍ତରାୟ ପରିଚାଳନା କରୁଥିବା ବେଳେ ଓଡ଼ିଶାର ପାରମ୍ପରିକ ରଜ ଦୋଳି, ରଜଗୀତର ଆସର, ରଜ ପାନ, ପିଠାପଣା ଲୋକଙ୍କୁ ସୁଲଭ ମୁଲ୍ୟରେ ଯୋଗାଇବାର ବ୍ୟବସ୍ଥା କରାଯାଇଛି। ପ୍ରାକୃତିକ ପରିବେଶ ମଧ୍ୟରେ ଦୋଳିର ବ୍ୟବସ୍ଥା କରାଯାଇଥିବା ବେଳେ ଚଳିତବର୍ଷର ମୁଖ୍ୟ ଆକର୍ଷଣ ହୁଳହୁଳି, ଶଙ୍ଖ ବାଦ୍ୟ ଆଦି ପାରମ୍ପରିକ ବାଦ୍ୟର ପ୍ରତିଯୋଗିତା କେବଳ ମହିଳା ଓ ଝିଅଙ୍କ ମଧ୍ୟରେ ଅନୁଷ୍ଠିତ ହୋଇଥିବା ନେଇ ସୂଚନା ମିଳିଛି।
