ସମାଜ ଡିଜିଟାଲ ଡେସ୍କ: ଦକ୍ଷିଣ କୁଏତର ମନଗଫ୍ ଅଞ୍ଚଳରେ ଥିବା ଏକ ୬ ମହଲା କୋଠାରେ ଅଗ୍ନିକାଣ୍ଡ ଘଟି ୪୯ ଜଣଙ୍କ ମୃତ୍ୟୁ ହୋଇଛି। ମୃତକଙ୍କ ମଧ୍ୟରେ ରହିଛନ୍ତି ୪୨ ଭାରତୀୟ। ଏହି ଘଟଣାରେ ୫୦ରୁ ଅଧିକ ଲୋକ ଗୁରୁତର ଆହତ ହୋଇଛନ୍ତି। କୋଠାରେ ୧୫୦ରୁ ଅଧିକ ଶ୍ରମିକ ଏବଂ କର୍ମଚାରୀ ରହୁଥିଲେ। ସମସ୍ତେ ଭାରତ, ପାକିସ୍ତାନ, ଫିଲିପିନ୍ସ ଏବଂ ନେପାଳର ବାସିନ୍ଦା ଥିଲେ। ଗଣମାଧ୍ୟମ ରିପୋର୍ଟ ଅନୁସାରେ, ଏନବିଟିସି ଗ୍ରୁପ ଏହି କୋଠାକୁ ଲିଜ୍ରେ ନେଇଥିଲା। କେରଳର ଜଣାଶୁଣା ବ୍ୟବସାୟୀ କେ.ଜି. ଆବ୍ରାହମ ଏନବିଟିସି ଗ୍ରୁପରେ ଭାଗିଦାରୀ ରହିବା ସହିତ କମ୍ପାନୀର ପରିଚାଳନା ନିର୍ଦ୍ଦେଶକ ରହିଛନ୍ତି।
ଏନବିଟିସି କୁଏତର ସବୁଠୁ ବଡ଼ ନିର୍ମାଣ ସଂସ୍ଥା। ମଧ୍ୟପ୍ରାଚ୍ୟ ସମେତ ଭାରତୀୟ ଉପମହାଦେଶରେ ସଂସ୍ଥାର ବ୍ୟବସାୟ ବ୍ୟାପ୍ତ ରହିଛି। ସଂସ୍ଥାର ଅଧ୍ୟକ୍ଷ ହେଉଛନ୍ତି ମହମ୍ମଦ ଏନ ଅଲବଦାହ। ତେବେ ୬୯ ବର୍ଷୀୟ ଆବ୍ରାହମଙ୍କ ସମ୍ପର୍କ କେରଳ ସହିତ ରହିଛି। ତାଙ୍କ ଘର କେରଳର ତିରୁଭଲ୍ଲା ଅଞ୍ଚଳରେ। ଦୀର୍ଘ ୩୦ ବର୍ଷ ହେବ ସେ କୁଏତରେ ରହିଆସୁଛନ୍ତି। ୨୦୧୮ ଏବଂ ୨୦୧୯ରେ କେରଳରେ ହୋଇଥିବା ବନ୍ୟା ସମୟରେ ସେ ପୀଡ଼ିତକୁ ସହାୟତା କରିଥିଲେ। ତାଙ୍କର କେଜିଏ ଗ୍ରୁପ ନାମରେ ବି ଏକ ନିଜସ୍ୱ ସଂସ୍ଥା ରହିଛି, ଯାହାର ଅଧ୍ୟକ୍ଷ ହେଉଛନ୍ତି ସେ ନିଜେ। କେଜିଏ ତୈଳ ଏବଂ ଏହା ସମ୍ବନ୍ଧୀୟ ଉତ୍ପାଦ ପ୍ରସ୍ତୁତ କରୁଥିବା ଶିଳ୍ପ ସହିତ ଜଡ଼ିତ।
ଏହାବ୍ୟତୀତ ଆବ୍ରାହମଙ୍କ ସଂସ୍ଥା କେଜିଏ ଇଞ୍ଜିନିୟରିଂ, ନିର୍ମାଣ, ମାର୍କେଟିଂ ଏବଂ ଶିକ୍ଷା କ୍ଷେତ୍ରରେ କାମ କରୁଛି। କୋଚିରେ ଥିବା ଏକ ୫ ପଞ୍ଚ ତାରକା ହୋଟେଲ କ୍ରାଉନ ପ୍ଲାଜାରେ ମଧ୍ୟ ତାଙ୍କର ମାଲିକାନା ରହିଛି। ବହୁତଗୁଡ଼ିଏ ପ୍ରୋଜେକ୍ଟରେ ସେ ନିବେଶ କରିଛନ୍ତି। ବ୍ଲକବଷ୍ଟର ଚଳଚ୍ଚିତ୍ର ‘ଆଡୁଜୀବୀଥମ’ ପାଇଁ ମଧ୍ୟ ସେ ପାଣ୍ଠି ଯୋଗାଣ କରିଛନ୍ତି।
