ଜି.ଉଦୟଗିରି : ଚଳିତ ସାଧାରଣ ନିର୍ବାଚନରେ କନ୍ଧମାଳ ଜିଲାର ଜି.ଉଦୟଗିରି ବିଧାନସଭା ନିର୍ବାଚନ ମଣ୍ଡଳୀରେ କଂଗ୍ରେସ ପ୍ରାର୍ଥୀଙ୍କ ବାଜିମାତ ହୋଇଥିବା ଜଣାପଡିଛି। ଜି.ଉଦୟଗିରି ନିର୍ବାଚନ ମଣ୍ଡଳୀର କଂଗ୍ରେସ ପ୍ରାର୍ଥୀ ପ୍ରଫୁଲ୍ଲ ଚନ୍ଦ୍ର ପ୍ରଧାନ ବିଜୟୀ ହୋଇଛନ୍ତି। ବାଲିଗୁଡ଼ା ଆଦିବାସୀ ମହାବିଦ୍ୟାଳୟରେ ୨୦ଟି ଟେବୁଲରେ ୨୨ ରାଉଣ୍ଡ ଭୋଟ ଗଣତି ହୋଇଥିଲା।
ଏକଦା କଂଗ୍ରେସର ଗଡ କୁହାଯାଉଥିବା ଜି.ଉଦୟଗିରି ନିର୍ବାଚନ ମଣ୍ଡଳୀରେ ବିଜେପି ପ୍ରାର୍ଥୀ ମାନଗୋବିନ୍ଦ ପ୍ରଧାନଙ୍କୁ ପଛରେ ପକାଇ ୯୦୨୯ଭୋଟ ବ୍ୟବଧାନରେ ବିଜୟୀ ହୋଇ ଗଡରକ୍ଷା କରିବାରେ କଂଗ୍ରେସ ପ୍ରାର୍ଥୀ ପ୍ରଫୁଲ୍ଲ ଚନ୍ଦ୍ର ପ୍ରଧାନ ସମର୍ଥ ହୋଇଛନ୍ତି। ବିଜୟୀ ପ୍ରଫୁଲ୍ଲ ଚନ୍ଦ୍ର ପ୍ରଧାନ ୫୨, ୮୧୪ଭୋଟ ପାଇଥିବା ବେଳେ ତାଙ୍କ ନିକଟତମ ପ୍ରତିଦ୍ବନ୍ଦୀ ମାନଗୋବିନ୍ଦ ପ୍ରଧାନ ୪୩, ୭୮୫ପାଇଛନ୍ତି। ସେହିପରି ପୂର୍ବତନ ଉପବାଚସ୍ପତି ତଥା ବିଜେଡି ପ୍ରାର୍ଥୀ ସାଲୁଗା ପ୍ରଧାନ ୪୦, ୭୪୦ଭୋଟ ପାଇ ତୃତୀୟ ସ୍ଥାନରେ ରହିଛନ୍ତି ବୋଲି ନିର୍ବାଚନ ଅଧିକାରୀ ସୂଚନା ଦେଇଛନ୍ତି। ବିଧାୟକ ନିଜ ପ୍ରତିକ୍ରିୟା ରେ ଜନସାଧାରଣ ମୋ ଉପରେ ଆସ୍ଥା ପ୍ରକଟ କରି ଥିବାରୁ ଭୋଟରଙ୍କୁ କୃତଜ୍ଞତା ଜଣାଇଛନ୍ତି। ସେହିପରି ଜିଲ୍ଲା ସଭାପତି ଚନ୍ଦ୍ର ପରିଡ଼ା ନିଜ ପ୍ରତିକ୍ରିୟାରେ ଧନବଳ ବାହୁବଳ ଶାସକ ଦଳର କାମକରିନାହି ବୋଲି ପ୍ରକାଶ କରିଛନ୍ତି।
ଟିକାବାଲି ବ୍ଲକ ଅନ୍ତର୍ଗତ ପାଡାଙ୍ଗି ଗ୍ରାମର ପ୍ରଫୁଲ୍ଲ ଚନ୍ଦ୍ର ପ୍ରଧାନ ପୂର୍ବରୁ ବ୍ଲକ ଚେୟାରମ୍ୟାନ ଭାବେ ପୂର୍ବରୁ ସଫଳତାର ସହ କାର୍ଯ୍ୟ ସମ୍ପାଦନ କରିଥିଲେ।
