ଜେରୁଜେଲମ୍: ଗାଜାରେ ହମାସ ଆତଙ୍କବାଦୀଙ୍କ ବିରୋଧରେ ଚାଲିଥିବା ଯୁଦ୍ଧରେ ଇସ୍ରାଏଲର ତିନି ସୈନିକ ପ୍ରାଣ ହରାଇଥିବାବେଳେ ଅନ୍ୟ ତିନିଜଣ ଆହତ ହୋଇଛନ୍ତି। ଇସ୍ରାଏଲର ରାଷ୍ଟ୍ରାୟତ୍ତ ରେଡିଓ ପ୍ରସାରଣକାରୀ ସଂସ୍ଥା କାନ ରେଡିଓ କହିଛି ଯେ ରାଫାର ଏକ କୋଠାରେ ଖଞ୍ଜା ଯାଇଥିବା ଆଇଇଡି ବିସ୍ଫୋରଣରେ ସୈନିକମାନେ ପ୍ରାଣ ହରାଇଛନ୍ତି। ଗତ ଦୁଇଦିନ ଧରି ଇସ୍ରାଏଲ ସେନା ରାଫାସ୍ଥିତ ଶରଣାର୍ଥୀ ଶିବିର ଉପରେ କ୍ଷେପଣାସ୍ତ୍ର ମାଡ କରିଚାଲିଥିବାବେଳେ ଏବେ ହମାସ ଆତଙ୍କବାଦୀଙ୍କ ଆକ୍ରମଣରେ ଇସ୍ରାଏଲ ସୈନିକ ପ୍ରାଣ ହରାଇଛନ୍ତି। ଇସ୍ରାଏଲ ଓ ହମାସ ଆତଙ୍କବାଦୀଙ୍କ ଏହି ଆକ୍ରମଣକୁ ନେଇ ରାଫା ସୀମା ଏବେ ଅଶାନ୍ତ ହୋଇଉଠିଛି। ରବିବାର ଓ ସୋମବାର ରାତିରେ ଇସ୍ରାଏଲ ସେନା ରାଫା ଉପରେ କରିଥିବା ଆକ୍ରମଣରେ ପ୍ରାୟ ୬୦ଜଣ ପ୍ରାଣ ହରାଇଛନ୍ତି। ଏମାନଙ୍କ ମଧ୍ୟରେ ଅନେକ ହେଉଛନ୍ତି ପାଲେଷ୍ଟାଇନ ନାଗରିକ।
