ସମ୍ବଲପୁର: ଆଗାମୀ ୨୫ ତାରିଖରେ ହେବାକୁ ଥିବା ସାଧାରଣ ନିର୍ବାଚନରେ ସମ୍ବଲପୁରର ବିକାଶ ପାଇଁ ଭୋଟ ଦିଅନ୍ତୁ ବୋଲି ପୂର୍ବତନ କାଉନସିଲର ତଥା ଆଇନଜୀବୀ ଭକ୍ତ ପ୍ରସାଦ ମିର୍ଦ୍ଧା ଅନୁରୋଧ କରିଛନ୍ତି। ଏହି ମର୍ମରେ ସମ୍ବଲପୁର ସିନସିୟର ସିଟିଜେନ ତରଫରୁ ବୁଧବାର ପୂର୍ବାହ୍ନରେ ସ୍ଥାନୀୟ ସାମ୍ବାଦିକ ଭବନଠାରେ ଆୟୋଜିତ ସାମ୍ବାଦିକ ସମ୍ମିଳନୀରେ ଯୋଗଦେଇ ସେ କହିଛନ୍ତି ଯେ, ଗଣତନ୍ତ୍ରର ମହାପର୍ବରେ ଏବେ ସମ୍ବଲପୁର ଅଞ୍ଚଳରେ ମୁଖ୍ୟତଃ ଦୁଇଟି ମୁଖ୍ୟ ପ୍ରତିଦ୍ୱନ୍ଦୀ ଦଳ ବିଜେପି ଓ ବିଜେଡି ମଧ୍ୟରେ ପ୍ରତ୍ୟାରୋପ ଚାଲିଛି। ସମ୍ବଲପୁରବାସୀଙ୍କୁ ସେମାନଙ୍କର ବହୁମୁଖୀ ବିକାଶ ପାଇଁ ସଠିକ ପ୍ରାର୍ଥୀଙ୍କୁ ଚୟନ କରିବାର ଆବଶ୍ୟକତା ରହିଛି। ବିଗତ କିଛି ବର୍ଷର ଇତିହାସକୁ ଦେଖିଲେ, ସ୍ପଷ୍ଟ ଦେଖାଯାଉଛି ଯେ, ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଚିନ୍ତାଧାର ଓ ନିର୍ମଳ ଭାବମୂର୍ତ୍ତୀ ଯୋଗୁଁ ଓଡ଼ିଶାବାସୀ ତାଙ୍କ ଉପରେ ଭରସା ରଖିଛନ୍ତି। ତାଙ୍କର ଯେଉଁ ଦୂରଦୃଷ୍ଟି ଦ୍ୱାରା ସେ ତଳସ୍ତରର ଶେଷ ବ୍ୟକ୍ତିଙ୍କ ନିକଟକୁ ସରକାରୀ ଯୋଜନା ଗୁଡିକ ଯଥା ଆହାର, ମମତା ଯୋଜନା, ସ୍ୱୟଂ ସହାୟିକା ଗ୍ରୁପ ଆଦି ଲାଭ ପହଞ୍ଚାଇଛନ୍ତି, ତାହା ପାଇଁ ଜନତାଙ୍କ ମଧ୍ୟରେ ବିଶ୍ୱାସ ଜନ୍ମାଇଛି।
ଏହା ସହିତ ଅଧିଷ୍ଠାତ୍ରୀ ଦେବୀ ମା’ ସମଲେଶ୍ୱରୀ ମନ୍ଦିରର ପୁନଃ ପରିବର୍ତ୍ତନ ପାଇଁ ଲୋକେ ଅନେକ ଖୁସି ଅଛନ୍ତି। ଯାହାକି ବିଗତ ଅନେକ ବର୍ଷର ବିଜେପିର ଶାସନ ମଧ୍ୟରେ ହୋଇ ପାରି ନ ଥିଲା। ବିଗତ ୫ ବର୍ଷ ମଧ୍ୟରେ ବିଧାୟକ ଜୟନାରାୟଣ ମିଶ୍ର ଓ ଲୋକସଭା ସାଂସଦ ନିତେଶ ଗଙ୍ଗଦେବ ସେଭଳି କିଛି କାର୍ୟ୍ୟ କରିଥିବାର ନଜରକୁ ଆସୁନାହିଁ। ଏଣୁ ସମ୍ବଲପୁରର ବହୁମୁଖୀ ବିକାଶ ପାଇଁ ବିଜେଡି ସପକ୍ଷରେ ମତଦାନ କରିଲେ ତାହା ସମ୍ବଲପୁରବାସୀଙ୍କ ପାଇଁ ଆଗାମୀ ଦିନରେ ବେଶ ସହାୟକ ହେବ ବୋଲି ସମ୍ବଲପୁର ସିନିୟର ସିଟିଜେନର ବିଶ୍ୱାସ ଥିବା ଶ୍ରୀ ମିର୍ଦ୍ଧା କହିଛନ୍ତି।
