ନୂଆଦିଲ୍ଲୀ: ଆମ ଆଦମୀ ପାର୍ଟି (ଆପ୍) ସାଂସଦ ସ୍ୱାତି ମାଲିୱାଲଙ୍କୁ ଅସଦାଚରଣ ମାମଲାରେ ଦିଲ୍ଲୀ ପୁଲିସ ମୁଖ୍ୟ ଅଭିଯୁକ୍ତ ବିଭବ କୁମାରଙ୍କୁ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲଙ୍କ ବାସଭବନରୁ ଶନିବାର ଗିରଫ କରିଛି। ବିଭବ ହେଉଛନ୍ତି ମୁଖ୍ୟମନ୍ତ୍ରୀଙ୍କ ବ୍ୟକ୍ତିଗତ ସହାୟକ। ସ୍ୱାତି ମୁଖ୍ୟମନ୍ତ୍ରୀଙ୍କୁ ଭେଟିବାକୁ ଆସିଥିବାବେଳେ ବିଭବ ତାଙ୍କୁ ମାରପିଟ କରିବା ସହିତ ଅସଦାଚରଣ କରିଥିବା ନେଇ ଅଭିଯୋଗ ହୋଇଥିଲା। ଏ ନେଇ ସ୍ୱାତି ଥାନାରେ ଲିଖିତ ଅଭିଯୋଗ କରିବା ପରେ ପୁଲିସ ବିଭବଙ୍କୁ ଖୋଜୁଥିଲା।
ତେବେ ବିଭବ ମୁଖ୍ୟମନ୍ତ୍ରୀଙ୍କ ବାସଭବନରେ ଥିବା ନେଇ ପୁଲିସକୁ ସୂଚନା ମିଳିଥିଲା। ଏହା ପରେ ଏସଏଚଓ ଏବଂ ଅତିରିକ୍ତ ଡିସିପିଙ୍କ ସହିତ ପୁଲିସ ଟିମ୍ ଶନିବାର ମୁଖ୍ୟମନ୍ତ୍ରୀଙ୍କ ବାସଭବନରେ ପହଞ୍ଚିଥିଲା। ପୁଲିସ ପହଞ୍ଚିବା ବେଳକୁ ବାସଭବନ ମୁଖ୍ୟ ଫାଟକ ଖୋଲା ରହିଥିଲା। ତେଣୁ ଗାଡ଼ିକୁ ଗେଟ୍ରେ ରୋକାଯାଇ ନ ଥିଲା। ପୁଲିସ ଟିମ ଆସୁଥିବା ନେଇ ପୂର୍ବରୁ ଖବର ଦିଆଯାଇଥିବାରୁ ଗୋଟ୍ ଖୋଲା ରଖାଯାଇଥିଲା। ପୁଲିସ ବାସଭବନରେ ପହଞ୍ଚିବା ପରେ ସେଠାରୁ ବିଭବଙ୍କୁ ଗିରଫ କରିଥିଲା।
ଅନ୍ୟପଟେ ଗିରଫଦାରି ପୂର୍ବରୁ ବିଭବ ପୁଲିସକୁ ଏକ ମେଲ୍ କରିଥିଲେ। ପୁଲିସକୁ ସେ ତଦନ୍ତରେ ସମସ୍ତ ପ୍ରକାର ସହଯୋଗ କରିବେ ବୋଲି ଲେଖିଥିଲେ। ଏତଲା ସମ୍ପର୍କରେ ସେ ଗଣମାଧ୍ୟମରୁ ଜାଣିବାକୁ ପାଇଥିଲେ। କିନ୍ତୁ ବର୍ତ୍ତମାନ ସୁଦ୍ଧା ତାଙ୍କୁ ଏତଲା ସମ୍ପର୍କରେ କୌଣସି ନୋଟିସ ପଠାଯାଇ ନାହିଁ ବୋଲି ମେଲ୍ରେ ଦର୍ଶାଇଛନ୍ତି।
Comments are closed.