ନୂଆଦିଲ୍ଲୀ: ‘ରାମ ମନ୍ଦିର ଯିବାରୁ କଂଗ୍ରେସ ମୋତେ ଘୃଣା କରିବା ଆରମ୍ଭ କଲା। ସେଥିପାଇଁ ମୁଁ ଦଳ ଛାଡ଼ିଲି ।’ କଂଗ୍ରେସ ବିରୋଧରେ ଏଭଳି ଚାଞ୍ଚଲ୍ୟକର ଅଭିଯୋଗ ଆଣିଛନ୍ତି ଦଳର ପୂର୍ବତନ ମୁଖପାତ୍ର ରାଧିକା ଖେରା । ରବିବାର ରାଧିକା କଂଗ୍ରେସର ପ୍ରାଥମିକ ସଦସ୍ୟ ପଦରୁ ଇସ୍ତଫା ଦେଇଥିଲେ । ଇସ୍ତଫା ଦେବାର କାରଣ ବିଷୟରେ ସୋମବାର ସେ ଏକ ଖବରଦାତା ସମ୍ମିଳନୀରେ ସୂଚନା ଦେଇଛନ୍ତି ।
ଗଣମାଧ୍ୟମକୁ ରାଧିକା କହିଛନ୍ତି, ‘ସେ ଯେବେ ଅଯୋଧ୍ୟା ରାମ ମନ୍ଦିର ଯାଇଥିଲେ, ତା’ ପରଠାରୁ ଦଳ ତାଙ୍କୁ ଘୃଣା କରିବା ଆରମ୍ଭ କରିଥିଲା । ଏପରି କି ସେ ମନ୍ଦିରର ଫଟୋ ଏବଂ ଭିଡିଓ ସୋସିଆଲ ମିଡିଆରେ ଶେୟାର କରିବାକୁ ଦଳ ତାଙ୍କୁ ଭର୍ତ୍ସନା କରିଥିଲା । ଏହାବ୍ୟତୀତ ନିର୍ବାଚନ ସମୟରେ ରାମ ମନ୍ଦିର ନ ଯିବାକୁ ଦଳ ପକ୍ଷରୁ ତାଙ୍କୁ ତାଗିଦ୍ କରାଯାଇଥିଲା । ମୁଁ ସବୁବେଳେ ଶୁଣିଛି ଯେ କଂଗ୍ରେସ ରାମ ବିରୋଧୀ, ସନାତନ ବିରୋଧୀ ଏବଂ ହିନ୍ଦୁ ବିରୋଧୀ, କିନ୍ତୁ ମୁଁ କେବେ ବିଶ୍ଵାସ କରି ନ ଥିଲି । ମାତ୍ର ଜେଜେ ମା’ଙ୍କ ସହିତ ମନ୍ଦିର ଦର୍ଶନ କରିବାକୁ ଯିବା ପରେ ଦଳର ଏହି ସତ୍ୟତା ଜାଣିବାକୁ ପାଇଲି । ଯେବେ ବି ମୁଁ ମନ୍ଦିର ଫଟୋ ଏବଂ ଭିଡିଓ ପୋଷ୍ଟ କରେ ସେବେ ମୋତେ ଗାଳି କରାଯାଏ’ ବୋଲି ରାଧିକା ଅଭିଯୋଗ କରିଛନ୍ତି ।
