ଭବାନୀପାଟଣା: ମମିତା ମେହେର ହତ୍ୟା ମାମଲା ତଥା ଗୋବିନ୍ଦ ସାହୁଙ୍କ ସନ୍ଦେହଜନକ ମୃତ୍ୟୁର ସିବିଆଇ ତଦନ୍ତ ହେବ ବୋଲି ବିଜେପିର ଏକ ମିଶ୍ରଣ ପର୍ବରେ ଯୋଗଦେଇ କେନ୍ଦ୍ର ଶ୍ରମ, ରୋଜଗାର , ଜଙ୍ଗଲ ଏବଂ ପରିବେଶ ମନ୍ତ୍ରୀ ଭୂପେନ୍ଦ୍ର ଯାଦବ କହିଛନ୍ତି। ଏଥିସହିତ ଗୋଲାମୁଣ୍ଡାର ପୂର୍ବତନ ବ୍ଲକ୍ ଅଧ୍ୟକ୍ଷ ବିନ୍ଦୁ ମହାନନ୍ଦଙ୍କୁ ସ୍ଥାନୀୟ ବିଧାୟକଙ୍କ ଇଙ୍ଗିତରେ ବାରମ୍ବାର ଜେଲ ପଠାଯିବା ଘଟଣାର ଉଚିତ୍ ଜବାବ ଦିଆଯିବ ବୋଲି କେନ୍ଦ୍ରମନ୍ତ୍ରୀ ଶ୍ରୀ ଯାଦବ କହିଥିଲେ। ଗତ ବୁଧବାର ଗୋଲାମୁଣ୍ଡା ବ୍ଲକ୍ ଉଦେଶୃଙ୍ଗ ଠାରେ ବିଜେପିର ଏକ ମିଶ୍ରଣ ପର୍ବ ଅନୁଷ୍ଠିତ ହେଇଥିଲା।
ଏଥିରେ ଗୋଲାମୁଣ୍ଡାର ପୂର୍ବତନ ବ୍ଲକ୍ ଅଧ୍ୟକ୍ଷ ବିନ୍ଦୁ ମହାନନ୍ଦ ପ୍ରାୟ ଏକ ହଜାରରୁ ଅଧିକ କର୍ମୀଙ୍କ ସହ ବିଜେପିରେ ଆନୁଷ୍ଠାନିକ ଭାବେ ଯୋଗ ଦେଇଥିଲେ। ତାଙ୍କୁ ବ୍ଲକ୍ ଅଧ୍ୟକ୍ଷ ପଦରୁ ହଟାଇବା ପାଇଁ ଦୁଇ ଦୁଇ ଥର ଜେଲ ପଠାଯାଇଥିବା କହି ବିଧାୟକଙ୍କ ଉପରେ ବର୍ଷିଥିଲେ ବିନ୍ଦୁ। ବିଜେପି ଜିଲା ଉପସଭାପତି ଅଜୟ ପାଣିଗ୍ରାହୀଙ୍କ ଅଧ୍ୟକ୍ଷତାରେ ଅନୁଷ୍ଠିତ ସଭାରେ ବିଜେପି ଲୋକସଭା ପ୍ରାର୍ଥୀ ମାଳବିକା ଦେଓ, ଜୁନାଗଡ଼ ବିଧାନସଭା ପ୍ରାର୍ଥୀ ମନୋଜ ମେହେର, ପୂର୍ବତନ ମନ୍ତ୍ରୀ ହିମାଂଶୁ ଶେଖର ମେହେରଙ୍କ ସମେତ ବହୁ ସଂଖ୍ୟାରେ ବିଜେପି ନେତୃବର୍ଗ ଯୋଗ ଦେଇଥିଲେ।
ସମସ୍ତ ବକ୍ତା ମାନେ ମମିତା ମେହେର ହତ୍ୟା ଏବଂ ଗୋବିନ୍ଦ ସାହୁ ମୃତ୍ୟୁ ମାମଲାର ତଦନ୍ତ ପାଇଁ ବିଜେପି ପଦକ୍ଷେପ ନେବ ବୋଲି ଦୃଢୋକ୍ତି ପ୍ରକାଶ କରିଥିଲେ। ଏଥିରୁ ଚଳିତ ନିର୍ବାଚନରେ ବିଜେପି ମମିତା ମେହେର ପ୍ରସଙ୍ଗ କୁ ପୁନର୍ଜୀବିତ କରିବାର ସୂଚନା ମିଳୁଛି। ଅନ୍ୟ ପକ୍ଷରେ ପ୍ରାୟ ପାଞ୍ଚ ହଜାରରୁ ଅଧିକ ଲୋକଙ୍କୁ ସଭାପାଇଁ ଏକଜୁଟ କରି ବିନ୍ଦୁ ମହାନନ୍ଦ ନିଜର ଦମ୍ ଦେଖାଇଲେ ବୋଲି ସବୁଠି ଚର୍ଚ୍ଚ ଚାଲିଛି। ସେଠାରୁ ଭବାନୀପାଟଣା ନିର୍ବାଚନ ମଣ୍ଡଳୀ ଅନ୍ତର୍ଗତ ଠେମରା ଗାଁରେ ଆୟୋଜିତ ଏକ ସାଧାରଣ ସଭାରେ ଉଦବୋଧନ ଦେଇ ରାଜ୍ୟ ସରକାରଙ୍କ ଉପରେ ବର୍ଷି ଥିଲେ କେନ୍ଦ୍ର ମନ୍ତ୍ରୀ।
ଜିଲା ସାଧାରଣ ସମ୍ପାଦକ ଯୁଗଳ ପୋଢ ଙ୍କ ଅଧ୍ୟକ୍ଷତାରେ ଆୟୋଜିତ ଏହି ସଭାରେ ସ୍ଥାନୀୟ ବିଧାୟକ ପ୍ରାର୍ଥୀ ପ୍ରଦୀପ୍ତ କୁମାର ନାଏକ, ଜିଲା ସଭାପତି ଆର୍ତ୍ତତ୍ରାଣ ମହାପାତ୍ର, ଜୁନାଗଡ଼ ନଗରପାଲ ମୁକେଶ ଅଗ୍ରୱାଲ, ଶରତ ନାଏକ, ଲୋକନାଥ ଦୁର୍ଗା, ପ୍ରମୁଖ ଉଦବୋଧନ ଦେଇଥିଲେ। ମନ୍ତ୍ରୀ ଏଠାରୁ ଭୁବନେଶ୍ୱର ପ୍ରତ୍ୟାବର୍ତ୍ତନ କରିଥିଲେ।
