କଲମପୁର: କଲମପୁର ମୁଖ୍ୟ ବଜାରରେ ଥିବା ଔଷଧ ଦୋକାନରୁ ଚୋରି ମାମଲାରେ ମଙ୍ଗଳବାର ଅଭିଯୁକ୍ତକୁ କଲମପୁର ପୁଲିସ ଗିରଫ କରି କୋର୍ଟ ଚାଲାଣ କରିଛି। ସମ୍ପୃକ୍ତ ଅଭିଯୁକ୍ତ ଜଣକ କଲମପୁର ମୁଖ୍ୟ ବଜାରରେ ଥିବା ଶ୍ରୀରାମ ମେଡିକାଲ ଷ୍ଟୋରରୁ ଚୋରି କରିଥିଲା। ଯାହାର ଦୃଶ୍ୟ ସିସିଟିଭି କ୍ୟାମେରାରେ କଏଦ ହୋଇଥିଲା। ଏହି ସିସିଟଭି ଫୁଟେଜରୁ ଚିହ୍ନଟ କରି ଅଭିଯୁକ୍ତକୁ ପୁଲିସ ଗିରଫ କରିବାରେ ସଫଳ ହୋଇଛି।
ସୂଚନା ଅନୁସାରେ, ସୋମବାର ଭୋର ସମୟରେ କଲମପୁର ମୁଖ୍ୟ ବଜାରରେ ଥିବା ଶ୍ରୀରାମ ମେଡିକାଲ ଷ୍ଟୋରରୁ ଚୋରି ହେଇଥିବା ନେଇ ଦୋକାନ ମାଲିକ ବିଶ୍ୱ ରଞ୍ଜନ ପଣ୍ଡା କଲମପୁର ପୁଲିସ ଥାନାରେ ଲିଖିତ ଅଭିଯୋଗ କରିଥିଲେ। ଏହିି ଲିଖିତ ଅଭିଯୋଗକୁ ଭିତ୍ତି କରି କଲମପୁର ଥାନା କେସ ନଂ ୬୦/୨୦୨୪ରେ ମାମଲା ରୁଜୁ କରିଥିଲେ। ଏହାସହ ଲିଖିତ ଅଭିଯୋଗ ଗ୍ରହଣ କରିବାର ୨୪ ଘଣ୍ଟା ମଧ୍ୟରେ କଲମପୁର ଥାନା ଅଧିକାରୀ ପ୍ରଦୀପ୍ତ କୁମାର କାନୁନଗୋଙ୍କ ନେତୃତ୍ୱରେ ଏସଆଇ ଡୋଳାମଣି ବିଶି, ଏଏସଆଇ ଶେଖର ଜେନା ପ୍ରମୁଖ ଚୋରି ଘଟଣାରେ ସଂପୃକ୍ତ କଲମପୁର ଗ୍ରାମର ଉମେଶ ନାଏକ ନାମକ ଜନୈକ ଯୁବକକୁ ଗିରଫ କରିଥିଲେ। ଏହାସହ ଅଭିଯୁକ୍ତଠାରୁ ଚୋରି କରିଥିବା ୨ହଜାର ଟଙ୍କା ଜବତ କରିଛନ୍ତି। ଏହି ଘଟଣାର ତଦନ୍ତକାରୀ ଅଧିକାରୀ ଭାବେ ଏସଆଇ ଡୋଳାମଣି ବିଶି ଘଟଣାର ତଦନ୍ତ କରୁଛନ୍ତି। ଏହାସହ ବିଭିନ୍ନ ଆନୁସଙ୍ଗିକ କାର୍ଯ୍ୟ ସମ୍ପାଦିତ କରିବା ପରେ କୋର୍ଟ ଚାଲାଣ କରିଛନ୍ତି। ପୁଲିସର ତ୍ୱରିତ ପଦକ୍ଷେପ ଯୋଗୁଁ ଅଞ୍ଚଳବାସୀ ପୁଲିସକୁ ପ୍ରଶଂସା କରିଛନ୍ତି।
