ସମ୍ବଲପୁର: ସ୍ଥାନୀୟ ସାକ୍ଷୀପଡ଼ା ଅଞ୍ଚଳରେ ଜଣେ ସନ୍ଦିଗ୍ଧ ଯୁବତୀ ଘୁରି ବୁଲୁଥିବାବେଳେ ପୁଲିସ ନିକଟରେ ଏନେଇ କୌଣସି ଖବର ନ ଥିବାର ଜଣାପଡ଼ିଛି। ପ୍ରାପ୍ତ ସୂଚନାନୁଯାୟୀ, ଜଣେ ଯୁବତୀ କିଛି ଦିନ ହେବ ଅଞ୍ଚଳରେ ରାତି ଅଧରେ ଘୁରି ବୁଲୁଥିବାର ଅଭିଯୋଗ ହୋଇ ଆସୁଥିଲା। ତେବେ ରବିବାର ରାତିରେ ସାକ୍ଷୀପଡ଼ାଠାରେ ଥିବା ଏକ୍ସିସ ବ୍ୟାଙ୍କ ପାଖ ଗଳିରେ ଲାଗିଥିବା ସିସିଟିଭିଗୁଡିକରେ ରାତ୍ରି ପ୍ରାୟ ୩ଟା ରୁ ୪ଟା ମଧ୍ୟରେ କଏଦ ହୋଇଥିବା ବିଭିନ୍ନ ଦୃଶ୍ୟରେ ଜଣେ ଯୁବତୀ ପ୍ରଥମେ ଏକ ଘର ଉପରୁ ତଳକୁ ଡେଇଁଥିଲେ। ଏହାପରେ ଉକ୍ତ ଘରର ପାଚେରୀ (ପ୍ରାୟ ୬ ଫୁଟ)କୁ ଡେଇଁ ଏଣେ ତେଣେ ବୁଲିବା ପରେ ବ୍ୟାଙ୍କ କଡରେ ଥିବା ଗଳିରେ ବେଶ୍ କିଛି ସମୟ ଧରି ବୁଲା ବୁଲି କରୁଥିଲେ। ଅଞ୍ଚଳରେ ଲାଗିଥିବା ବିଭିନ୍ନ ସିସିଟିଭି ଫୁଟେଜରୁ ସ୍ପଷ୍ଟ ଜଣାପଡୁଛି ଯେ, ଯୁବତୀ ଜଣକ ଅଞ୍ଚଳ ସହିତ ବେଶ୍ ଭଲଭାବରେ ପରିଚିତ। ବୋଧହୁଏ କୌଣସି ଚୋରିର ଘଟଣା କିମ୍ବା ଅନ୍ୟ କିଛି ଅପରାଧିକ ଗତିବିଧିରେ ସେ ଲିପ୍ତ ଥାଇ ପାରନ୍ତି ବୋଲି ଅଞ୍ଚଳରେ ଚର୍ଚ୍ଚା ଜୋର ଧରିଛି।
ଅପରପକ୍ଷରେ ଘର ଉପରୁ ଯୁବତୀ ଜଣକ ଡେଇଁବା ଏବଂ ଏହାପରେ ପ୍ରାୟ ୬ ଫୁଟରୁ ଅଧିକ ଉଚ୍ଚତା ବିଶିଷ୍ଟ ପାଚେରୀ ଡେଇଁବା ଘଟଣା ସମସ୍ତଙ୍କୁ ଚକିତ କରୁଛି। ଏଥିରୁ ଅନୁମାନ କରାଯାଉଛି ଯେ, ଯୁବତୀ ଜଣକ ଜଣେ ବୃତ୍ତିଗତ ଅପରାଧି। ଏହି ଘଟଣା ଜଣାପଡ଼ିବା ଏବଂ ଭାଇରାଲ ହେବା ପରେ ଖବର ପୁଲିସ ପାଖକୁ ଯାଇଥିବା ବେଳେ ଖବର ଲେଖାଯିବା ପର୍ଯ୍ୟନ୍ତ ପୁଲିସ ପାଖରେ କୌଣସି ସୂଚନା ନ ଥିବା ଜଣାପଡ଼ିଛି। ଏ ସମ୍ପର୍କରେ ଧନୁପାଲି ପୁଲିସ କହିଛି ଯେ, ଏଭଳି ଏକ ଘଟଣା ଘଟିଥିବାର ନଜରକୁ ଆସିଛି। ତେବେ ଏ ପର୍ଯ୍ୟନ୍ତ ଯୁବତୀର ପରିଚୟ ଜଣାପଡ଼ି ନ ଥିବାବେଳେ ଘଟଣାର ତଦନ୍ତ ଚାଲିଛି ବୋଲି ପୁଲିସ କହିଛି।
