ଠାକୁରମୁଣ୍ଡା: ଚାଉଳ ନେଇ ଟ୍ରାକ୍ଟର ରେ ଘରକୁ ଫେରୁଥିବା ବେଳେ ରାସ୍ତା କଡକୁ ଓଲଟି ପଡ଼ିଲା ଟ୍ରାକ୍ଟର। ଏହି ଦୁର୍ଘଟଣାରେ ଘଟଣାସ୍ଥଳରେ ଜଣେ ମହିଳାଙ୍କ ମୃତ୍ୟୁ ହୋଇଥିବାବେଳେ ୩ଜଣ ଗୁରୁତର ଆହତ ହୋଇଛନ୍ତି।
ମୟୂରଭଞ୍ଜ ଜିଲ୍ଲା ମହୁଲଡିହା ଥାନା ଅନ୍ତର୍ଗତ ମୂଳାପାଳ ଗ୍ରାମରୁ କିଛି ମହିଳା ଏକ ଟ୍ରାକ୍ଟର ଯୋଗେ ରାସନ ଚାଉଳ ନେଇ ନିଜ ଗ୍ରାମ ଫେରୁଥିଲେ। ଗ୍ରାମ ନିକଟରେ ଥିବା ଏକ ବୁଲାଣି ନିକଟରେ ଟ୍ରାକ୍ଟରଟି ଭାରଶ୍ୟାମ ହରାଇ ରାସ୍ତା କଡକୁ ଓଲଟି ପଡିଥିଲା। ଫଳରେ ଜରକରୁ ବାପଘର ମୁଳାପାଳ ଯାଉଥିବା ଜମୁନା ସୋଏ (୨୫) ନାମକ ଜଣେ ମହିଳାଙ୍କ ମୃତ୍ୟୁ ହୋଇଛି।
ଏହି ଦୁର୍ଘଟଣାରେ ଆହତ ହୋଇଥିବା ମହିଳାଙ୍କୁ ଠାକୁରମୁଣ୍ଡା ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରରେ ଚିକିତ୍ସା ପାଇଁ ଭର୍ତ୍ତି କରାଯାଇଛି। ଖବର ପାଇ ମହୁଲଡିହା ଥାନା ଅଧିକାରୀ ଅଶୋକ କୁମାର ପୈଇ ଘଟଣା ସ୍ଥଳରେ ପହଞ୍ଚି ଲୋକଙ୍କୁ ବୁଝାସୁଝା ପରେ ମୃତଦେହକୁ ଜବତ କରିଥିଲେ ଏବଂ ବ୍ୟବଚ୍ଛେଦ ପାଇଁ କରଞ୍ଜିଆ ଉପଖଣ୍ଡ ଚିକିତ୍ସାଲୟକୁ ପଠାଇଥିଲେ। ମହୁଲଡିହା ପୁଲିସ କେସ୍ ନଂ ୨୮/ ୨୦୨୪ ମାମଲା ରୁଜୁ କରି ଅଧିକ ତଦନ୍ତ କରୁଛି ।
