ଆଠଗଡ: ନିର୍ବାଚନ ସମୟରେ ମଦ ସମେତ ଅନ୍ୟ ନିଶା କାରବାରକୁ ଳୋକିବାକୁ ଅବକାରୀ ଆୟୁକ୍ତଙ୍କ ନିର୍ଦେଶ ପରିପ୍ରେକ୍ଷୀରେ ଆଠଗଡ ଓ ତିଗିରିଆ ଅଞ୍ଚଳରେ ନିୟମିତ ଚଢାଉ ଜାରି ରହିଛି । ତେବେ ଯେତେ ଚଢାଉ ଏବଂ ମଦ ଓ ପୋଚ ଜବତ ହେଲେ ବି ମଦ ମାଫିଆଙ୍କ ଉପରେ ସେପରି କୌଣସି ପ୍ରଭାବ ପଡୁନାହିଁ, ବରଂ ଚଢାଉ ଓ ଜବତ ପରଦିନଠାରୁ ପୁଣି ପୂର୍ବ ପରି ମଦ ରନ୍ଧା ଏବଂ ଚାଲାଣ ଜାରି ରହୁଛି ।
ଶନିବାର କଟକ ଜିଲା ଅବକାରୀ ଅଧିକ୍ଷକ ଦେବାଶିଷ ପଟେଲ ଓ ଫ୍ଲାଇଙ୍ଗ ସ୍କ୍ୱାର୍ଡ ଅଧିକ୍ଷକ ସିଦ୍ଧେଶ୍ଵର ବେଶ୍ରାଙ୍କ ସମେତ ଉପଅଧିକ୍ଷକ ଅରୂପା ପାଣିଗ୍ରାହୀ ଓ ନିମାଇଁ ଚରଣ ସିଂହଙ୍କ ନେତୃତ୍ବରେ ଆଠଗଡ ଥାନା ଅନ୍ତର୍ଗତ କୋରଙ୍ଗାରେ ବଡଧରଣର ଚଢାଉ କରାଯାଇଥିଲା । ବୁଦା ଜଙ୍ଗଲ ଓ ଚାଷଜମି ମଧ୍ୟରେ ଲୁଚାଇ ରଖାଯାଇଥିବା ଏବଂ ମଦ ରନ୍ଧା ଯାଉଥିବା ଭାଟିଗୁଡିକ ଉପରେ ଚଢାଉ କରାଯାଇ ଚାଲାଣ ପାଇଁ ଥିବା ସଦ୍ଯ ପ୍ରସ୍ତୁତ ୭୭୦୦ ଲିଟର ଦେଶୀ ମଦ ଏବଂ ମଦ ପ୍ରସ୍ତୁତି ପାଇଁ ଗଚ୍ଛିତ ୮୬୮୦ ଲିଟର ପୋଚ ଜବତ କରାଯାଇ ଘଟଣାସ୍ଥଳରେ ନଷ୍ଟ କରି ଦିଆଯାଇଥିଲା ।
ଏହି ଚଢାଉ ପରେ ଫେରାର ମଦ ମାଫିଆଙ୍କ ନାମରେ ୪ ଟି ମାମଲା ରୁଜୁ କରାଯାଇଛି । ଆଠଗଡ ଅବକାରୀ ନିରୀକ୍ଷକ ହେମନ୍ତ ମହାନନ୍ଦିଆ, ଭ୍ରାମ୍ୟମାଣ ସ୍କ୍ୱାର୍ଡର ନିରୀକ୍ଷକ ଅଭିରାମ ସାହୁ, ରଙ୍କନିଧି ମଲ୍ଲିକ, କମଳଲୋଚନ ପାଇକରାୟ, ଉପନିରୀକ୍ଷକ ଅରୁଣ କୁମାର ଭୋଇ, ତରୁଣ କୁମାର ପାତ୍ରଙ୍କ ସମେତ ବହୁ ଅଧିକାରୀ ଓ କର୍ମଚାରୀ ଏହି ଚଢାଉରେ ଅଂଶଗ୍ରହଣ କରିଥିଲେ ।
Comments are closed.