ଗୁରୁଡିଝାଟିଆ : ଲଗାଣ ବର୍ଷା ଯୋଗୁଁ ରାସ୍ତା ଅବସ୍ଥା ବିପର୍ଯ୍ୟସ୍ତ ହୋଇପଡିଛି। କେଉଁଠି ରାସ୍ତା ଦବିଛି ତ ଆଉ କେଉଁଠି ପାଣି ଜମିଛି। ଏହାଦ୍ୱାରା ଗାଡି ଚାଳକମାନେ ନାହିଁନଥିବା ଅସୁବିଧାର ସମ୍ମୁଖିନ ହେଉଛନ୍ତି। ଏଥିରୁ ବାଦ ପଡିନାହାନ୍ତି କୋମଳମତି ବିଦ୍ୟାର୍ଥୀମାନେ । କାଦୁଅ ପଚପଚ ରାସ୍ତାରେ ପାଦରେ ଚାଲି ଗଲାବେଳେ ପିନ୍ଧିଥିବା ପୋଷାକ ମଧ୍ୟ କାଦୁଅ ଛିଟାରେ ଅପରିଷ୍କାର ହେଉଛି। ଏଭଳି ଅବସ୍ଥା ଦେଖାଦେଇଛି ପୁରୁଣା କଟକ-ସମ୍ବଲପୁର ରାସ୍ତାର ବିଦ୍ୟାଧରପୁର, କଖଡି, ପନ୍ଥେଇ ଓ ଦହିସରା ନିକଟରେ। ରାସ୍ତା ସଂପ୍ରସାରଣ କାର୍ଯ୍ୟ କଚ୍ଛପ ଗତିରେ ଚାଲୁ ଥିବାରୁ ଏଭଳି ଦୟନୀୟତା ଭୋଗୁଛନ୍ତି ଗାଡିଚାଳକ ଓ ପଥିକ ମାନେ। ପାଗ ଅନୁକୂଳ ଥିବା ସମୟରେ ଠିକାଦାର ମନ୍ଥର ଗତିରେ କାର୍ଯ୍ୟ କରୁଥିବାରୁ ଏବେ ସୁଦ୍ଧା ରାସ୍ତାର ବିଭିନ୍ନ ସ୍ଥାନରେ ମଝିରେ ମଝିରେ ପିଚୁ ନହୋଇ ମାଟି ଅବସ୍ଥାରେ ରହିଅଛି। ଯାହାର ଦୁର୍ଦ୍ଦଶା ଭୋଗୁଛନ୍ତି ଜନସାଧାରଣ। ଏପରିକି ଅନେକବାର ଦୁର୍ଘଟଣା ଘଟୁଛି। ୪ଚକିଆ ଗାଡିଚକା ଛିଟାରେ ପଥଚାରୀର ପୋଷାକର ରଙ୍ଗ ମଧ୍ୟ ବଦଳି ଯାଉଛି। ରାସ୍ତା ଓ କୋଠାବାଡି ବିଭାଗ କର୍ତ୍ତୃପକ୍ଷଙ୍କ ସଠିକ୍ ତାଗିଦ ହେଉନଥିବାରୁ ଠିକାଦାର ମୁନମୁଖି କାର୍ଯ୍ୟ କରୁଥିବା ସାଧାରଣରେ ଅଭିଯୋଗ ହେଉଛି। ତୁରନ୍ତ ଏଥପ୍ରତି ଦୃଷ୍ଟିଦେବା ପାଇଁ ଦାବି ହୋଇଛି।
Comments are closed.