ବାଙ୍ଗାଲୋର: କର୍ଣ୍ଣାଟକର ରାଜଧାନୀ ବାଙ୍ଗାଲୋରର ଲୋକପ୍ରିୟ ରାମେଶ୍ୱରମ କାଫେରେ ବିସ୍ଫୋରଣ ଘଟଣାର ତଦନ୍ତ ଭାର ନେସ୍ନାଲ୍ ଇନ୍ଭେଷ୍ଟିଗେସନ୍ ଏଜେନ୍ସି(ଏନଆଇଏ)କୁ ହସ୍ତାନ୍ତର କରାଯାଇଛି। ଏନେଇ ସୋମବାର ବିଶ୍ବସ୍ତ ସୂତ୍ରରୁ ଖବର ମିଳିଛି। ପୂର୍ବ ବାଙ୍ଗାଲୋରର ବ୍ରୁକଫିଲ୍ଡସ୍ଥିତ ରାମେଶ୍ୱରମ କାଫେରେ ମାର୍ଚ୍ଚ ୧ ତାରିଖରେ ଘଟିଥିବା ଏହି ବିସ୍ଫୋରଣରେ ପ୍ରାୟ ୯ ଜଣ ଲୋକ ଗୁରୁତର ଭାବେ ଆହତ ହୋଇଥିଲେ।
ସିସିଟିଭି ଯାଞ୍ଚରୁ ଜଣାପଡ଼ିଛି ଯେ, ଟୋପି, ମାସ୍କ ଓ ଚଷମା ପିନ୍ଧି କାନ୍ଧରେ ବ୍ୟାଗ୍ ପକାଇ କାଫେ ଆଡ଼କୁ ଯାଉଥିବା ବ୍ୟକ୍ତି ଜଣକଙ୍କ ହିଁ ଏହି ମାମଲାର ମୁଖ୍ୟ ସନ୍ଦିଗ୍ଧ। ତେବେ ବର୍ତ୍ତମାନ ସୁଦ୍ଧା ସେହି ବ୍ୟକ୍ତି ବିଷୟରେ କୌଣସି ସୂଚନା ମିଳିପାରିନାହିଁ।
ସୂଚନାଯୋଗ୍ୟ, ବାଙ୍ଗାଲୋରର ରାମେଶ୍ୱରମ କାଫେରେ ଶୁକ୍ରବାର ରହସ୍ୟମୟ ବିସ୍ଫୋରଣ ଘଟିଥିଲା। ସେଠାରେ ଏକ ବ୍ୟାଗରେ ଥିବା କିଛି ସନ୍ଦିଗ୍ଧ ବସ୍ତୁରେ ବିସ୍ଫୋରଣ ଘଟି ପ୍ରାୟ ୯ ଜଣ ଲୋକ ଗୁରୁତର ଭାବେ ଆହତ ହୋଇଥିଲେ। ପରେ ଏହା ଆଇଇଡି ବସ୍ଫୋରଣ ବୋଲି ଜଣାପଡ଼ିଥିଲା। ଜଣେ ବ୍ୟକ୍ତି ଆଇଇଡି ଥିବା ବ୍ୟାଗ୍ ଆଣି କାଫେରେ ରଖିଥିବା ସିସିଟିଭି ଫୁଟେଜ୍ରେ ଦେଖିବାକୁ ମିଳିଥିଲା।
