ନୂଆଦିଲ୍ଲୀ: ବଲିଉଡ଼ ଚଳଚ୍ଚିତ୍ର ନିର୍ମାତା ରାଜକୁମାର ସନ୍ତୋଷୀଙ୍କୁ ୨ ବର୍ଷ ଜେଲ୍ ଦଣ୍ଡାଦେଶ ହୋଇଛି। ଚେକ୍ ବାଉନ୍ସ ମାମଲାରେ ଗୁଜରାଟର ଜାମନଗରସ୍ଥିତ ଅଦାଲତ ନିର୍ମାତାଙ୍କୁ ୨ ବର୍ଷ ଜେଲ୍ ଦଣ୍ଡାଦେଶ ସହ ୨ କୋଟି ଟଙ୍କା ଜରିମାନାରେ ଦଣ୍ଡିତ କରିଛନ୍ତି। ଅପରପକ୍ଷେ, ଏହି ଦଣ୍ଡାଦେଶ ବିରୋଧରେ ଆବେଦନ କରିବା ପାଇଁ ଅଦାଲତ ସନ୍ତୋଷୀଙ୍କୁ ୩୦ ଦିନ ସମୟ ଦେଇଛନ୍ତି।
ଅଭିଯୋଗ ଅନୁସାରେ, ଶିଳ୍ପପତି ତଥା ପରିବହନ ବ୍ୟବସାୟୀ ଅଶୋକ ଲାଲ୍ ଗୋଟିଏ ଚଳଚ୍ଚିତ୍ର ପାଇଁ ସନ୍ତୋଷୀଙ୍କୁ ୧ କୋଟି ଟଙ୍କା ଋଣ ଦେଇଥିଲେ। ଏହି ଋଣ ପରିଶୋଧ ବାବଦକୁ ସନ୍ତୋଷୀ ତାଙ୍କୁ ୧୦ ଲକ୍ଷ ଟଙ୍କାର ୧୦ଟି ଚେକ୍ ଦେଇଥିଲେ। ତେବେ ଅଶୋକ ଲାଲ୍ ଚେକ୍ଗୁଡ଼ିକୁ ଦାଖଲ କରିବା ପରେ ଜାଣିବାକୁ ପାଇଥିଲେ ଯେ, ସନ୍ତୋଷୀଙ୍କ ଆକାଉଣ୍ଟ୍ରେ ଟଙ୍କା ନ ଥିବାରୁ ସେ ସବୁ ବାଉନ୍ସ ହୋଇଯାଇଥିଲା। ଅଭିଯୋଗକାରୀ ଆହୁରି ମଧ୍ୟ ଅଭିଯୋଗ କରିଛନ୍ତି ଯେ, ଚେକ୍ ବାଉନ୍ସ ହେବା ପରେ ସନ୍ତୋଷୀଙ୍କ ସହ ଯୋଗାଯୋଗ କରିବାକୁ ଚେଷ୍ଟା କରିଥିଲେ ମଧ୍ୟ ସେ କେଉଁଆଡ଼େ ଗାୟବ ହୋଇଯାଇଥିଲେ।
