ଡେସ୍କ: ପାକିସ୍ତାନରେ ଆଜି ସାଧାରଣ ନିର୍ବାଚନ ପାଇଁ ଭୋଟ୍ ଗ୍ରହଣ ଶେଷ ହେବା ପରେ ଭୋଟ ଗଣତି ଆରମ୍ଭ ହୋଇଛି। କଡ଼ା ସୁରକ୍ଷା ସତ୍ତ୍ୱେ ବୋମା ବିସ୍ଫୋରଣ, ଗ୍ରେନେଡ୍ ଆକ୍ରମଣ ଓ ଗୁଳିମାଡ଼ରେ ଦୁଇ ଶିଶୁଙ୍କ ସମେତ ୯ ଜଣଙ୍କ ମୃତ୍ୟୁ ଘଟିଛି। ଡେରା ଇସ୍ମାଇଲ ଖାନ ଜିଲ୍ଲାର କୁଲାଚି ଅଞ୍ଚଳରେ ଏକ ପାଟ୍ରୋଲିଂ ଦଳ ଉପରକୁ ବୋମା ବିସ୍ଫୋରଣ ଓ ଗୁଳି ମାଡ଼ରେ ୫ ଜଣ ପୁଲିସ କର୍ମଚାରୀଙ୍କ ମୃତ୍ୟୁ ଘଟିଛି। ବେଲୁଚିସ୍ତାନର ଏକ ମତଦାନ କେନ୍ଦ୍ର ବାହାରେ ହୋଇଥିବା ବିସ୍ଫୋରଣରେ ଦୁଇ ଶିଶୁଙ୍କ ମୃତ୍ୟୁ ଘଟିଛି।
ଖାଇବର ପଖ୍ତୁନଖୱା ପ୍ରଦେଶର ଟାଙ୍କ ଜିଲ୍ଲାରେ ସୁରକ୍ଷାକର୍ମୀଙ୍କ ଗାଡ଼ି ଉପରକୁ ବନ୍ଧୁକଧାରୀମାନେ ଗୁଳି ଚଳାଇବାରୁ ଜଣେ ବ୍ୟକ୍ତିଙ୍କ ମୃତ୍ୟୁ ଘଟିଛି। ବେଲୁଚିସ୍ତାନରେ ଗତକାଲି ଦକ୍ଷିଣ-ପଶ୍ଚିମ ପ୍ରଦେଶରେ ହୋଇଥିବା ଦୁଇଟି ବିସ୍ଫୋରଣରେ ୨୬ ଜଣଙ୍କ ମୃତ୍ୟୁ ଘଟିଛି। ଇସ୍ଲାମିକ ଷ୍ଟେଟ୍ ଏଥିପାଇଁ ନିଜକୁ ଦାୟୀ କରିଛି। ଆସନ୍ତାକାଲି ଅର୍ଥାତ ଶୁକ୍ରବାର ସକାଳେ ଗଣତିର ସ୍ପଷ୍ଟ ଚିତ୍ର ସାମ୍ନାକୁ ଆସିବାର ସମ୍ଭାବନା ରହିଛି। ସୂଚନା ମୁତାବକ, ଭୋଟ୍ ଗଣତି ରାତି ସାରା ଚାଲିବ।
