ନୀଳଗିରି : କଳି ଝଗଡ଼ା ଛଡ଼ାଇବାକୁ ଯାଇଥିବା ବଡ଼ବାପାଙ୍କୁ ତାଙ୍କ ପୁତୁରା ପିଟି ପିଟି ହତ୍ୟା କରିଛି । ଏଭଳି ଏକ ଅଭାବନୀୟ ଘଟଣା ଦେଖିବାକୁ ମିଳିଛି ବାଲେଶ୍ୱର ଜିଲା ଅଧୀନ ନୀଳଗିରି ଅଞ୍ଚଳରେ ।
ବରହମପୁର ଥାନା, ମାଟିଆଳି ପଞ୍ଚାୟତ ଅଧୀନ ପଥରଗୁମୁରା ଅଞ୍ଚଳର କଟିଆ ସିଂ ଦୀର୍ଘ ପ୍ରାୟ ୨୫ବର୍ଷ ହେବ ପରିବାର ସହ ନୀଳଗିରି ଥାନା ଅଯୋଧ୍ୟା ନିକଟ ନୂଆସାହି ଗାଁରେ ରହି ଆସୁଥିଲେ । ପୈତୃକ ସ୍ଥାନରେ ଧାନଚାଷ ହୋଇଥିବା ଯୋଗୁ କଟିଆ ୮ଦିନ ପୂର୍ବରୁ ସେଠାକୁ ଯାଇ ଧାନ ଅମଳ କରୁଥିଲେ । ଗତକାଲି ଭାଇ ରମାକାନ୍ତଙ୍କ ପୁଅ କମଳାକାନ୍ତ ଓ ପୁତୁରା ବୋହୁ ଗାଦରଙ୍କ ମଧ୍ୟ କଳି ଝଗଡ଼ା ଲାଗିଥିଲା । ପୁତୁରା କମଳାକାନ୍ତ ଏକ ମାରଣାସ୍ତ୍ର ଧରି ତାଙ୍କ ସ୍ତ୍ରୀକୁ ମାରିବାକୁ ଗୋଡ଼ାଉଥିବା ଦେଖି ବଡ଼ବାପା କଟିଆ ପ୍ରତିରୋଧ କରିଥିଲେ । ଏଥିରେ ଉତକ୍ଷିପ୍ତ ହୋଇ ପୁତୁରା କମଳାକାନ୍ତ ବଡ଼ବାପା କଟିଆଙ୍କ ମୁଣ୍ଡ, ମୁହଁକୁ ପିଟି ପିଟି ଫଟାଇ ଦେଇଥିଲେ । ରକ୍ତ ଜୁଡୁବୁଡୁ ହୋଇ ପଡ଼ିଥିବା କଟିଆଙ୍କୁ ସେଠାରୁ ଉଦ୍ଧାର କରାଯାଇ ପ୍ରଥମେ ନୀଳଗିରି ଓ ପରେ ବାଲେଶ୍ୱର ଡାକ୍ତରଖାନାରେ ଭର୍ତ୍ତି କରାଯାଇଥିଲେ ହେଁ ଚିକିତ୍ସାଧୀନ ଅବସ୍ଥାରେ ତାଙ୍କର ମୃତ୍ୟୁ ଘଟିଛି । ଏନେଇ ଆଜି ମୃତକଙ୍କ ପୁଅ ବୀରକିଶୋର ସିଂ ବରହମପୁର ଥାନାରେ ଏତଲା ଦେବା ପରେ ପୁଲିସ ପକ୍ଷରୁ ଏକ ହତ୍ୟା ମାମଲା ରୁଜୁ କରାଯାଇ ଅଭିଯୁକ୍ତ ପୁତୁରାକୁ ଗିରଫ କରାଯାଇଛି ।
