ଆଠଗଡ଼: ଆଠଗଡ଼ର ଅନ୍ୟତମ ଅଗ୍ରଣୀ ସ୍ୱେଚ୍ଛାସେବୀ ଅନୁଷ୍ଠାନ ଜଷ୍ଟ ଫର ୟୁ ସେବା ସଂଘ ର ସଭାପତିଙ୍କ ଜନ୍ମଦିନ ଓ ଗଣେଶ ପୂଜାକୁ ନିଆରା ଢଙ୍ଗରେ ରାସ୍ତା ମରାମତି କରି ପାଳନ କଲେ। ସଂଘର ପ୍ରତିଷ୍ଠାତା ସଭାପତି ତଥା ସମାଜସେବୀ ସୁଧାଂଶୁ ଶେଖର ସାହୁଙ୍କ ପରାମର୍ଶକ୍ରମେ ଓ ନେତୃତ୍ୱରେ କ୍ଲବର ସଦସ୍ୟମାନେ ମଙ୍ଗଳବାର ସବୁଠାରୁ ବ୍ୟସ୍ତବହୁଳ ଚାନ୍ଦବାଲି ଛକଠାରେ ୬୫ନଂ ରାଜ୍ୟ ରାଜପଥରେ ସୃଷ୍ଟି ହୋଇଥିବା ବଡ ବଡ ଖାଲଖମାକୁ ମରାମତି କରିଥିଲେ। ଏହି ଖାଲଖମା ଯୋଗୁଁ ସେଠାରେ ଗାଡିମଟର ଚଳାଚଳ ଅସୁବିଧା ହେଉଥିବାବେଳେ ବାରମ୍ବାର ପୂର୍ତ୍ତବିଭାଗ କର୍ତ୍ତୃପକ୍ଷଙ୍କୁ ଅଭିଯୋଗ ଓ ବିଭିନ୍ନ ଖବରକାଗଜରେ ଖବର ପ୍ରକାଶନ ପରେ ମଧ୍ୟ ମରାମତି କରାଗଲା ନାହିଁ। ଏହାକୁ ଦୃଷ୍ଟିରେ ରଖି ଜଷ୍ଟ ଫର ୟୁ ସଂଗଠନର ଉପଦେଷ୍ଟା ଲକ୍ଷ୍ମୀନାରାୟଣ ଭଞ୍ଜଙ୍କ ପ୍ରୋତ୍ସାହନରେ ସଭ୍ୟ ଅମ୍ଲାନ ପରିଡ଼ା, ସମ୍ବିତ ପ୍ରଧାନ, ପାୟଲ ବର୍ମା, ବୃନ୍ଦାବନ ବେହେରା, ସଂଜୟ ସ୍ୱାଇଁ, ସୌମ୍ୟ ନାୟକ ଓ ସାଇ ଶ୍ୱେତା ସାହୁ ପ୍ରମୁଖ ରାସ୍ତା ମରାମତି କରିଥିଲେ। ଚାନ୍ଦବାଲିଛକ ବଜାର କମିଟି ଓ ସାଧାରଣ ଲୋକ ସଂଗଠନର ଏପରି ଜନକଲ୍ୟାଣକାରୀ ପଦକ୍ଷେପକୁ ପ୍ରଂଶସା କରାଯାଇଥିଲା।
Comments are closed.