ଡେସ୍କ: ଚଳିତ ମାସ ୧୩ରେ ଚନ୍ଦ୍ରଯାନ -୩ର ଉତକ୍ଷେପଣ ହେବାକୁ ସମୟ ଧାର୍ଯ୍ୟ କରାଯାଇଥିବା ବେଳେ ଏଥିପାଇଁ ବିଭିନ୍ନ ପ୍ରକ୍ରିୟା ଆରମ୍ଭ କରାଯାଇଛି। ବୁଧବାର ଶ୍ରୀହରିକୋଟା ସ୍ପେସପୋର୍ଟର ସତୀଶ ଧାୱନ ମହାକାଶ କେନ୍ଦ୍ରରେ ଚନ୍ଦ୍ରଯାନ -୩କୁ ଜିଏସଏଲ୍ଭି ମାର୍କ ୩ ଉତକ୍ଷେପଣ ଯାନ ସହ ସଂଯୋଗ କରାଯାଇଛି। ଭାରତୀୟ ମହାକାଶ ଗବେଷଣା ସଂସ୍ଥା – ଇସ୍ରୋ ଏକ ଟୁଇଟ୍ ଜରିଆରେ ଏହା ଜଣାଇଛି। ଏହି ମାସର ୧୩ରୁ ୧୯ ମଧ୍ୟରେ ଏହାର ଉତକ୍ଷେପଣ କରିବା ଯୋଜନା କରାଯାଇଛି।
ଚନ୍ଦ୍ରଯାନ ୧ ଏବଂ ୨ ଭଳି ଚନ୍ଦ୍ରଯାନ -୩ ପ୍ରପୁଲସନ୍ ମଡ୍ୟୁଲ୍ ଚନ୍ଦ୍ରକୁ ପରିକ୍ରମା କରିବ। ଇସ୍ରୋ ରୋଭରକୁ ଚନ୍ଦ୍ର ପୃଷ୍ଠରେ ଧୀରେ ଧୀରେ ଖସାଇବାକୁ ଦ୍ୱିତୀୟ ଥର ପ୍ରୟାସ କରିବ। ୨୦୧୯ର ଚନ୍ଦ୍ରଯାନ -୨ ମିଶନରୁ ତ୍ରୁଟି ଜାଣିବା ପରେ ଏଥର ଚନ୍ଦ୍ରଯାନ -୩ ଅବତରଣ ସମୟରେ ସେହି ବିଷୟ ପ୍ରତି ଅଧିକ ଧ୍ୟାନ ଦିଆଯିବ।
