କେନ୍ଦୁଝରଗଡ଼: ଝୁମ୍ପୁରା ବ୍ଲକ ନିଶ୍ଚିନ୍ତପୁର ପଞ୍ଚାୟତ କାର୍ଯ୍ୟାଳୟ ଠାରେ ଶୁକ୍ରବାର ପ୍ଲାନ ଇଣ୍ଡିଆ ପକ୍ଷରୁ ବିଶ୍ୱ ସ୍ୱାସ୍ଥ୍ୟ ଦିବସ ପାଳିତ ହୋଇଯାଇଛି। ସ୍ଥାନୀୟ ସରପଞ୍ଚ ପୁଷ୍ପାଞ୍ଜଳି ମୁଣ୍ଡା ମୁଖ୍ୟଅତିଥି ଭାବେ ଯୋଗଦେଇ ଏହି ଅବସରରେ ଆୟୋଜିତ ସ୍ୱାସ୍ଥ୍ୟ ଶିବିରକୁ ଉଦ୍ଘାଟନ କରିଥିଲେ। ଚଳିତବର୍ଷର ଆହ୍ୱାନ ‘ସମସ୍ତଙ୍କ ପାଇଁ ସ୍ୱାସ୍ଥ୍ୟ ସେବା’ ସମ୍ପର୍କରେ ସଚେତନାତ୍ମକ କାର୍ଯ୍ୟକ୍ରମ ସହ ଉପସ୍ଥିତ ସମସ୍ତ ଜନସାଧାରଣଙ୍କ ମାଗଣା ସ୍ୱାସ୍ଥ୍ୟ ପରୀକ୍ଷା କରାଯାଇଥିଲା।
ପ୍ଲାନ ଇଣ୍ଡିଆ ଜିଲା ସଂଯୋଜକ ଡାକ୍ତ ପ୍ରମୋଦ କୁମାର ନନ୍ଦ ଉପସ୍ଥିତ ରହି ୬୮ଜଣଙ୍କ ସ୍ୱାସ୍ଥ୍ୟ ପରୀକ୍ଷା କରିବା ସହ ମାଗଣାରେ ଔଷଧ ଯୋଗାଇ ଦେଇଥିଲେ। ସ୍ୱାସ୍ଥ୍ୟ ହିଁ ସମ୍ପଦ ଉପରେ ଗୁରୁତ୍ୱାରୋପ କରି ସ୍ୱାସ୍ଥ୍ୟ ସମ୍ବନ୍ଧୀୟ ବାର୍ତ୍ତା ପ୍ରଦାନ କରିଥିଲେ। ଏହି କାର୍ଯ୍ୟକ୍ରମରେ ପଞ୍ଚାୟତ ପ୍ରତିନିଧି, କର୍ମଚାରୀ, ଆଶା ଓ ଅଙ୍ଗନବାଡିକର୍ମୀ, ସ୍ୱୟଂ ସହାୟିକା ଗୋଷ୍ଠୀ କର୍ମକର୍ତ୍ତା ଅଂଶଗ୍ରହଣ କରିଥିଲେ। ନାଏବ ସରପଞ୍ଚ ସୁଦର୍ଶନ ମହାନ୍ତ, ୱାର୍ଡ ସଭ୍ୟ ସୁଦାମ ମୁଣ୍ଡା, କଲ୍ୟାଣୀ ମହାନ୍ତ, ଟିକାକରଣ ମିତ୍ର ବାଣୀସ୍ମୀତା ପ୍ରଧାନ, ସଞ୍ଜୁକ୍ତା ମହାନ୍ତ, ହୀରାମଣୀ ମହାନ୍ତ, ସୁନୀଲ ବାରିକ ପ୍ରମୁଖ ଯୋଗଦେଇ କାର୍ଯ୍ୟକ୍ରମକୁ ସଫଳ କରିଥିଲେ।
