ପିପିଲି:ପିପିଲି ନିକଟବର୍ତ୍ତି ପୋପରଙ୍ଗା ଠାରେ ୪୩ତମ ରାମନାଟ୍ୟ ତଥା ରାମନବମୀ ସାଂସ୍କୃତିକ କାର୍ଯ୍ୟକ୍ରମ ମହାସମାରୋହରେ ଆରମ୍ଭ ହୋଇଛି। ଶ୍ରୀ ଶ୍ରୀ ରାମଚରିତ ମାନସ ପାରାୟଣ ସମିତି ପକ୍ଷରୁ ଆୟୋଜିତ ଏହି କାର୍ଯ୍ୟକ୍ରମରେ ୩୦ ତାରିଖରେ ଅଧିବାସ, କଳସ ରୋପଣ, ଚରୁଅନ୍ନ ପ୍ରସାଦ ଓ ୩୧ ତାରିଖରେ ରାମନାଟ୍ୟ, ବାଳିବଦ୍ଧ ଅନୁଷ୍ଠିତ ହୋଇଥିଲା। ଯାହାକି ବେଶ୍ ଆକର୍ଷଣୀୟ ହେବା ସହ ଦର୍ଶକଙ୍କୁ ମନ୍ତ୍ରମୁଗ୍ଧ କରିଥିଲା।
ଲକ୍ଷ୍ମୀଧର ପଣ୍ଡା ଓ ରାଧାମୋହନ ମହାନ୍ତିଙ୍କ ନିର୍ଦ୍ଦେଶନାରେ ଅନୁଷ୍ଠିତ ଏହି ରାମନାଟ୍ୟକୁ ଦେଖିବା ପାଇଁ ପ୍ରତ୍ୟହ ପୋପରଙ୍ଗା, ଶୁଆବରେଇ, ଅଜ୍ଜୁନଗୋଦା, ବିନ୍ଧା, ପାଚଲପୁର, ପମସରା ସମେତ ଆଖପାଖ ଅଞ୍ଚଳରୁ ୩ହଜାରରୁ ଉର୍ଦ୍ଧ ଭକ୍ତ, ଶ୍ରଦ୍ଧାଳୁ ଓ ଦର୍ଶକଙ୍କ ଭିଡ ସେଠାରେ ହେଉଥିବା ପରିଲକ୍ଷିତ ହୋଇଛି।
ଏହି ରାମନାଟ୍ୟରେ କଣ୍ଠଶିଳ୍ପୀ ପ୍ରଦୀପ କୁମାର ପ୍ରଧାନ ଓ ନାରାୟଣ ପ୍ରଧାନ କଣ୍ଠଦାନ କରିଥିବା ବେଳେ ପ୍ରତାପ କୁମାର ପ୍ରଧାନ, ସୁଶାନ୍ତ କୁମାର ସ୍ୱାଇଁ, ନୃସିଂହ ପ୍ରଧାନ, ଶତୃଘ୍ନ ନାୟକ, ସଦାଶିବ ପ୍ରଧାନଙ୍କ ସମେତ ପୋପରଙ୍ଗା ଗ୍ରାମବାସୀମାନେ ସମସ୍ତ କାର୍ଯ୍ୟକୁ ପରିଚାଳନା କରୁଛନ୍ତି। ୧ ତାରିଖ ଶନିବାର ଦିନ ହନୁମାନଙ୍କ ଜୟଯାତ୍ରା ଓ ଲଙ୍କାପୋଡି ଅନୁଷ୍ଠିତ ହେବାକୁ ଥିବା ବେଳେ ୨ ତାରିଖରେ ଶ୍ରୀବିଗ୍ରହଙ୍କ ବିମାନ ଯାତ୍ରା ଅନୁଷ୍ଠିତ ହେବ।
