ପ୍ରସିଦ୍ଧ ଗୁପ୍ତେଶ୍ୱର ପୀଠର ସଂପୂର୍ଣ୍ଣ ସୌନ୍ଦର୍ଯ୍ୟକରଣ କରାଯିବ: ମୁଖ୍ୟ ଶାସନ ସଚିବ

କୋରାପୁଟ(କାର୍ଯ୍ୟାଳୟ): ରାଜ୍ୟ ମୁଖ୍ୟ ଶାସନ ସଚିବ ସୁରେଶ ଚନ୍ଦ୍ର ମହାପାତ୍ର ଦୁଇ ଦିନିଆ କୋରାପୁଟ ଜିଲ୍ଲା ଗସ୍ତରେ ଆସି ବିଭିନ୍ନ ଉନ୍ନୟନମୂଳକ କାର୍ଯ୍ୟ ତଦାରଖ କରିଛନ୍ତି। ଗତକାଲି ଜୟପୁର ଏୟାର ପୋର୍ଟରେ ପହଞ୍ଚିବା ପରେ ଟର୍ମିନାଲ ଗୃହ ନିର୍ମାଣ ତଦାରଖ କରିଥିଲେ। ଏହାପରେ କୋରାପୁଟ ଜିଲ୍ଲା ସଦର ମହକୁମା ଡାକ୍ତରଖାନାର ଉନ୍ନୟନମୂଳକ କାର୍ଯ୍ୟ ତଦାରଖ କରିଥିଲେ। ଏହାପରେ ଗୁପ୍ତେଶ୍ୱର ଅଭିମୁଖେ ଯାଇଥିଲେ। ଡକ୍ରୀ ଘାଟିରେ ନିର୍ମାଣାଧିନ ରାସ୍ତା କାର୍ଯ୍ୟ ଦେଖିବା ପରେ ପ୍ରସିଦ୍ଧ ଶୈବ ପୀଠ ଗୁପ୍ତେଶ୍ୱର ପରିଦର୍ଶନ କରିଥିଲେ। ସେଠାରେ ନିର୍ମାଣ କରାଯାଉଥିବା ବିକାଶମୂଳକ କାର୍ଯ୍ୟ ତଦାରଖ କରିବା ସହ ନିର୍ଦ୍ଧାରିତ ସମୟ ସୀମା ମଧ୍ୟରେ ଶେଷ କରିବାକୁ ନିର୍ଦ୍ଦେଶ ଦେଇଥିଲେ। ପ୍ରସିଦ୍ଧ ଶୈବ ପୀଠ ଗୁପ୍ତେଶ୍ୱରର ସୌନ୍ଦର୍ଯ୍ୟକରଣ କରାଯିବା ସହ ଭକ୍ତମାନଙ୍କ ନିମନ୍ତେ ସମସ୍ତ ସୁବିଧା କରାଯିବ ବୋଲି ମୁଖ୍ୟ ଶାସନ ସଚିବ ସୁରେଶ ଚନ୍ଦ୍ର ମହାପାତ୍ର କହିଛନ୍ତି।

ଏହି ଗସ୍ତ ସମୟରେ କୋରାପୁଟ ଜିଲ୍ଲାପାଳ ଅବଦ୍ଦାଲ ଏମ ଅଖତର, ଜିଲ୍ଲା ପରିଷଦ ମୁଖ୍ୟ ଉନ୍ନୟନ ଅଧିକାରୀ ତଥା ନିର୍ବାହୀ ଅଧିକାରୀ ଗୌରବ ଶିବାଜୀ ଇସଲୱାର, ରାସ୍ତା ଓ ଗୃହ ନିର୍ମାଣ ଜଯପୁର ବିଭାଜନର ଅଧିକ୍ଷଣ ଯନ୍ତ୍ରୀ ଭାସ୍କର ସାମନ୍ତରାୟ ପ୍ରମୁଖଙ୍କ ସହ ଅନ୍ୟାନ୍ୟ ଅଧିକାରୀ ଉପସ୍ଥିତ ଥିଲେ। ସନ୍ଧ୍ୟାରେ ଜିଲ୍ଲାପାଳଙ୍କ କାର୍ଯ୍ୟାଳୟ ପରିସରରେ ନିର୍ମାଣାଧିନ ଉନ୍ନତୀକରଣ ଗୃହର ଉଦଘାଟନ କରିଥିଲେ। ମୁଖ୍ୟ ଶାସନ ସଚିବ ସୁରେଶ ଚନ୍ଦ୍ର ମହାପାତ୍ର ପତ୍ନୀଙ୍କ ସହ କୋରାପୁଟ କଫି ପଏଣ୍ଟକୁ ଯାଇ କୋରାପୁଟ କଫି ପିଇଥିଲେ। ଆଜି ସକାଳେ କୋରାପୁଟ ସହୀଦ ଲକ୍ଷ୍ମଣ ନାୟକ ମେଡିକାଲ କଲେଜ ଓ ହସପିଟାଲରେ ନିର୍ମାଣାଧିନ ୬୫୦ ଶଯ୍ୟା ବିଶିଷ୍ଟ ଅଧ୍ୟାପନା ହସପିଟାଲର କାର୍ଯ୍ୟ ତଦାରଖ କରିବା ପରେ ପର୍ଯ୍ୟଟନ ସ୍ଥଳୀ ଦେଓମାଳୀ ଓ କୋଟିଆ ପରିଦର୍ଶନ କରିଥିଲେ।

ଦୁଇଦିନିଆ କୋରାପୁଟ ଜିଲ୍ଲା ଗସ୍ତରେ ଆସିଥିବା ମୁଖ୍ୟ ଶାସନ ସଚିବ ଆଜି କୋଟିଆ ଓ ଦେଓମାଳି, ଜାନିଗୁଡା, ଗାଲିଗାଵଦାର ଓ ରଣାସିଙ୍ଗ ପରିଦର୍ଶନ କରି ବିଭିନ୍ନ ଉନ୍ନୟନମୂଳକ କାର୍ଯ୍ୟର ସମୀକ୍ଷା କରିଛନ୍ତି । ଓଡ଼ିଶାର ଉଚ୍ଚତମ ଶୃଙ୍ଗରେ ରାଜ୍ୟ ସରକାରଙ୍କ ଦ୍ବାରା ଚାଲିଥିବା ବିଭିନ୍ନ ଉନ୍ନୟନମୂଳକ କାର୍ଯ୍ୟକ୍ରମକୁ ଦେଖିବା ସହ କାର୍ଯ୍ୟକ୍ରମ ସମ୍ପର୍କରେ ଜିଲ୍ଲାପାଳଙ୍କ ସହ ଆଲୋଚନା କରିଥିଲେ । ଏହାପରେ କୋଟିଆ ସ୍ଥିତ ଶୀତଳ ଭଣ୍ଡାରର ସ୍ଥିତି କଣ ରହିଛି ଓ ଏହା ଲୋକଙ୍କ କାର୍ଯ୍ୟରେ ଆସୁଛି କି ନାହିଁ ସେ ସମ୍ପର୍କରେ ଗ୍ରାମବାସୀଙ୍କ ସହ ପଚାରି ବୁଝିଥିଲେ ତାହାସହ କୋଟିଆରେ ସ୍ୱୟଂ ସହାୟକ ଗୋଷ୍ଠି ମାଧ୍ୟମରେ ଅଞ୍ଚଳର ଝାଡୁ କିଭଳି ସଂଗ୍ରହ କରାଯାଉଛି ଓ ତାହାର ବିକ୍ରୟ କିଭଳି କରାଯାଉଛି ସେ ସମ୍ପର୍କରେ ଗ୍ରାମର ସ୍ୱୟଂ ସହାୟକ ଗୋଷ୍ଠୀ ସହ ଆଲୋଚନା କରିଥିଲେ । କୋଟିଆରୁ ଜାନୀଗୁଡା ରେ କରାଯାଉଥିବା ଷ୍ଟ୍ରବେରୀ ଚାଷ ନିକଟକୁ ଯାଇ ଷ୍ଟ୍ରବେରୀ ଚାଷ ସମ୍ପର୍କରେ ବାସନା ଗେମେଲଙ୍କ ସହ ଚାଷ କିଭଳି କରାଯାଉଛି, କିପରି ବିକ୍ରି କରାଯାଉଛି ଓ ଏହି ଅଞ୍ଚଳରେ ଅଧିକ ଚାଷ କିଭଳି ହୋଇପାରିବ ସେନେଇ ଗୁରୁତ୍ୱ ଦେବାପାଇଁ ଆଇଟିଡିଏଙ୍କ ସହ ଆଲୋଚନା ମଧ୍ୟ କରିଥିଲେ। ଏହାସହ ଏହି ଗଛରୁ କିଭଳି ଚାରା ସୃଷ୍ଟି କରାଯାଇପାରିବ ଓ ଚାଷୀଙ୍କୁ ଅଧିକ ତାଲିମ ପ୍ରଦାନ କରାଯିବ ସେ ସମ୍ପର୍କରେ ଅଧିକାରୀଙ୍କ ସହ ଆଲୋଚନା କରିଥିଲେ ।ଏହାପରେ ନୂଆଗାଁ ଗ୍ରାମପଞ୍ଚାୟତର ଗାଲିଗାବଦର ସ୍ଥିତ ରାଥାବାଲି ଜଳପ୍ରପାତ ଠାରେ ଜଙ୍ଗଲ ବିଭାଗ ଦ୍ଵାରା ପ୍ରସ୍ତାବିତ ପ୍ରକଳ୍ପ ତଥା ଇକୋ କଟେଜ ର ଶିଳାନ୍ୟାସ କରିଥିଲେ । ସେଠାରେ ସଚିବ ଶ୍ରୀ ମହାପାତ୍ର ଜଙ୍ଗଲ ଏବଂ ପରିବେଶ ପ୍ରତି ଧ୍ୟାନ ଦେଇ ନିର୍ମାଣ କାର୍ଯ୍ୟ କରିବାକୁ ନିର୍ଦ୍ଦେଶ ଦେଇଥିଲେ । ଏହି ସମୟରେ ନୂଆଗାଁ ପଞ୍ଚାୟତର କିଛି ଯୁବକ ଓ ପୂର୍ବତନ ସରପଞ୍ଚ ସୁନିଲ ଖରା ମୁଖ୍ୟ ଶାସନ ସଚିବଙ୍କ ଭେଟି ବ୍ଲକ ମଧ୍ୟରେ ଚାଲିଥିବା ଉନ୍ନୟନମୂଳକ କାର୍ଯ୍ୟରେ ଅଞ୍ଚଳର ଲୋକଙ୍କୁ କାମ ନ ମିଳିବା ଓ ଲୋକେ ନିଜ ଅଞ୍ଚଳରେ କାମ ନପାଇ ଆନ୍ଧ୍ରକୁ ଦାଦନ ଖଟିବାକୁ ଯିବା ସହିତ ଅଞ୍ଚଳର ଯୁବକମାନଙ୍କୁ ଉକ୍ତ କାର୍ଯ୍ୟରେ ସାମିଲ କରୁନଥିବା ନେଇ ଅଭିଯୋଗ ମଧ୍ୟ କରିଥିବା ଦେଖିବାକୁ ମିଳିଥିଲା । ଏହାପରେ ରଣାସିଙ୍ଗଠାରେ ନୂତନ ଭାବରେ ନିର୍ମାଣ କରାଯାଇଥିବା ଅଙ୍ଗନବାଡ଼ି ଗୃହ ଓ ବିଦ୍ୟାଳୟର ଶୁଭାରମ୍ଭ କରିଥିଲେ ଏବଂ ଛାତ୍ର ଛାତ୍ରୀଙ୍କ ବ୍ୟାଗ ମଧ୍ୟ ପ୍ରଦାନ କରିଥିଲେ। ତେବେ ମୁଖ୍ୟ ଶାସନ ସଚିବଙ୍କ ଗସ୍ତ ପୂର୍ବରୁ ପଟ୍ଟାଙ୍ଗି ଠାରୁ ଆରମ୍ଭ କରି କୋଟିଆକୁ ସଂଯୋଗ କରୁଥିବା ରାସ୍ତାରେ ରହିଥିବା ଖାଲ ଖମା ଓ ଅଳିଆ ଆବର୍ଜନାକୁ ରାତି ଅଧିଆ ତରବରିଆ ଭାବରେ ସଫା ସୁତୁରା କରିବାସହ ରାସ୍ତାରେ ରହିଥିବା ଖାଲ ଖମାରେ ପିଚୁ ଓ ମାଟି ଗୋଡି ପକାଇ ରାସ୍ତାଘାଟ ସମତଳ କରାଯାଇଥିବା ନଜରକୁ ଆସିଛି ।

ଗତ କିଛି ଦିନ ତଳେ କୋରାପୁଟ ଗସ୍ତରେ ଆସିଥିବା ୫-ଟି ସଚିବ ଭି କେ ପାଣ୍ଡିଆନ ଦେଓମାଳିକୁ ଆକାଶ ମାର୍ଗ ଦେଇ ପରିଦର୍ଶନ କରି ଫେରିଯାଇଥିବା ବେଳେ ବର୍ତ୍ତମାନ ମୁଖ୍ୟ ଶାସନ ସଚିବଙ୍କ ସଡକ ମାର୍ଗଦେଇ ଉନ୍ନୟନମୂଳକ କାର୍ଯ୍ୟର ସମୀକ୍ଷା କରିବାକୁ ନେଇ ବୁଦ୍ଧିଜୀବୀ ମହଲରେ ଚର୍ଚ୍ଚାର ବିଷୟ ପାଲଟିଛି ।

ସୂଚନାଯୋଗ୍ୟ, ଗତବର୍ଷ ମୁଖ୍ୟ ଶାସନ ସଚିବ କୋଟିଆ ଗସ୍ତରେ ଆସି ଦେଇଥିବା ପ୍ରତିଶୃତି ମଧ୍ୟରୁ କେତୋଟି ପୂରଣ ହୋଇ ନଥିବାବେଳେ କୋଟିଆ ସରପଞ୍ଚ ଲିଉ ଗେମେଲ ଏହି ପ୍ରତିଶ୍ରୁତି ଗୁଡିକ ମଧ୍ୟ ଅତିଶୀଘ୍ର ପୁରଣକରନ୍ତୁ ବୋଲି ତାଙ୍କ ପ୍ରତିକ୍ରିୟାରେ ପ୍ରକାଶ କରିଛନ୍ତି ।