ସମ୍ବଲପୁର : ସମ୍ବଲପୁରର ଉପକଣ୍ଠସ୍ଥ ନୀଳଡୁଙ୍ଗୁରୀ ସ୍ଥିତ ଶୈବ ପୀଠରେ ସମ୍ବଲପୁର ଜିଲା ବିଦ୍ୟୁତ ଉପଭୋକ୍ତା ସଙ୍ଗଠନର ଏକ ବୈଠକରେ ରବିବାର ଶରତ ଚନ୍ଦ୍ର ସାହୁଙ୍କ ଅଧ୍ୟକ୍ଷତା ଓ ସାମାଜିକ କର୍ମୀ ଡ. ରାଜାରାମ ଷଡଙ୍ଗୀଙ୍କ ଆହ୍ୱାନରେ ଆୟୋଜିତ ହୋଇଥିଲା। ଏହି ବୈଠକରେ ବିଦ୍ୟୁତ ଉପଭୋକ୍ତାଙ୍କ ବିଭିନ୍ନ ସମସ୍ୟା ଉପରେ ଆଲୋଚନା ପରେ ମୁଖ୍ୟମନ୍ତ୍ରୀଙ୍କୁ ଏକ ଦାବିପତ୍ର ପ୍ରଦାନ ପାଇଁ ନିଷ୍ପତ୍ତି ନିଆଯାଇଥିଲା। ଏହି କ୍ରମରେ ମୁଖ୍ୟମନ୍ତ୍ରୀଙ୍କୁ ସୋମବାର ୫ ଦଫିଆ ଦାବିପତ୍ର ପ୍ରଦାନ କରାଯାଇଛି। ସମ୍ବଲପୁର ଜିଲାପାଳଙ୍କ ଜରିଆରେ ମୁଖ୍ୟମନ୍ତ୍ରୀଙ୍କୁ ସମ୍ବଲପୁର ଜିଲା ବିଦ୍ୟୁତ ଉପଭୋକ୍ତା ସଙ୍ଗଠନ ତରଫରୁ ପ୍ରଦତ୍ତ ଦାବିପତ୍ର ଅନୁଯାୟୀ, ବିଦ୍ୟୁତ ବକେୟା ଦେୟକୁ ସମ୍ପୁର୍ଣ୍ଣ ଛାଡ କରିବା, ଓଡିଶା ବିଦ୍ୟୁତ ବୋର୍ଡ ଚୁକ୍ତି ଅନୁଯାୟୀ ହୀରାକୁଦ ଜଳ ବିଦ୍ୟୁତ ପ୍ରକଳ୍ପର ୫୦ କିମି ବ୍ୟାସାର୍ଦ୍ଧ ମଧ୍ୟରେ ଅବସ୍ଥିତ ବିଦ୍ୟୁତ ଉପଭୋକ୍ତାଙ୍କୁ ସ୍ୱତନ୍ତ୍ର ରିହାତି, ଚାଷ ଜମିରେ ଲାଗିଥିବା ବିଦ୍ୟୁତ ପୋଲ ପାଇଁ କ୍ଷତିପୂରଣ ପ୍ରଦାନ, ଦାରିଦ୍ର୍ୟ ସୀମା ତଳେ ଥିବା ବିଦ୍ୟୁତ ଉପଭୋକ୍ତାଙ୍କୁ ସରକାରଙ୍କ ଦ୍ୱାରା ନିର୍ଦ୍ଧାରିତ ଚୁକ୍ତି ଅନୁଯାୟୀ ନିଶୁଳ୍କ ବିଦ୍ୟୁତ ପ୍ରଦାନ ଓ କୃଷିକ୍ଷେତ୍ରରେ ବ୍ୟବହାର ହେଉଥିବା ବିଦ୍ୟୁତ ଶୁଳ୍କ ନିମନ୍ତେ ସ୍ୱତନ୍ତ୍ର ରିହାତି ବ୍ୟବସ୍ଥା ପାଇଁ ଦାବି କରାଯାଇଛି।
Comments are closed.