ଝାଡ଼ଖଣ୍ଡ: ଝାଡ଼ଖଣ୍ଡ ମୁଖ୍ୟମନ୍ତ୍ରୀ ହେମନ୍ତ ସୋରେନଙ୍କୁ ଇଡି ସମନ କରିଛି । ବେଆଇନ ଖଣି ମାମଲାରେ ହେମନ୍ତଙ୍କୁ ପୁଣି ଇଡି ସମନ କରିଥିବା ଜଣାପଡ଼ିଛି । ମାମଲାକୁ ନେଇ ଅଧିକ ପଚରାଉଚରା କରିବାକୁ ଏନଫୋର୍ସମେଣ୍ଟ ନିର୍ଦ୍ଦେଶାଳୟ ତାଙ୍କୁ କାର୍ଯ୍ୟାଳୟକୁ ଡକିଥିବା ସୂଚନା ମିଳିଛି । ଆସନ୍ତାକାଲି ରାଞ୍ଚି ସ୍ଥିତ ଇଡି କାର୍ଯ୍ୟାଳୟରେ ହେମନ୍ତଙ୍କୁ ହାଜର ହେବାକୁ କହିଛି ଇଡି ।
ଇଡିର ସମନକୁ ନେଇ ଜେଏମଏମ ନେତା ମନୋଜ ପାଣ୍ଡେ ପ୍ରତିକ୍ରିୟା ରଖିଛନ୍ତି । ମନୋଜ କହିଛନ୍ତି ଇଡି ସମନ କରିଛି, ସେ ତାର କାମ କରିବ । ଯଦି ଆମ ପ୍ରତି ଅନ୍ୟାୟ ହୁଏ ତେବେ ଆମେ କୋର୍ଟକୁ ଯିବୁ । ଏନେଇ ଆଇନ ବିଶେଷଜ୍ଞଙ୍କ ପରାମର୍ଶ ନିଆଯିବ । ଏହା କେବଳ ପ୍ରତିଶୋଧର ରାଜନୀତି ବୋଲି ଜେଏମଏମ ନେତା ମନୋଜ ପାଣ୍ଡେ ତାଙ୍କ ପ୍ରତିକ୍ରିୟାରେ କହିଛନ୍ତି ।
ଖାଲି ସେତିକି ନୁହେଁ, ଅର୍ଥ ହେରଫେର ମାମଲାରେ ସୋରେନଙ୍କ ଘନିଷ୍ଠ ସହଯୋଗୀ ପଙ୍କଜ ମିଶ୍ରଙ୍କୁ ମଧ୍ୟ ଇଡି ପୂର୍ବରୁ ଜେରା କରିଥିଲା । ଏବଂ ତାଙ୍କ ବାସଭବନରେ ଚଢ଼ାଉ କରିଥିଲା । ବିଭିନ୍ନ ବ୍ୟାଙ୍କ ପାସବୁକ୍ ସହ ଅନେକ କାଗଜପତ୍ର ଜବତ କରିଥିଲା ଇଡି । ପ୍ରିଭେନସନ୍ ଅଫ୍ ମନି ଲଣ୍ଡ୍ରିଂ ମାମଲାରେ ଜୁଲାଇ ୧୯ରେ ତାଙ୍କୁ ଗିରଫ କରାଯାଇଥିଲା । ସେ ବର୍ତ୍ତମାନ ନ୍ୟାୟିକ ହେପାଜତରେ ଅଛନ୍ତି।
