ଚୌଦ୍ୱାର: ଚୌଦ୍ୱାର ଥାନା ଅନ୍ତର୍ଗତ ଶଙ୍କରପୁର ରେଲୱେ ବାଇପାସ୍ ଗଡ଼ା ନିକଟରେ ଥିବା ଏକ ଦେଶୀ ମଦ ଦୋକାନ ଉପରକୁ ବୋମା ଫିଙ୍ଗିଥିବା ଅଭିଯୋଗରେ ଜଣେ ଦୁର୍ବୃତ୍ତକୁ ପୁଲିସ ଗିରଫ କରିଛି । ଗିରଫ ଅଭିଯୁକ୍ତ ଜଣକ ଚୌଦ୍ୱାର ପୌରପାଳିକା କେଦାରେଶ୍ୱରର ଦୀପକ କୁମାର ରାଉତ(୩୫) ବୋଲି ଜଣାପଡ଼ିଛି । ପୁଲିସର ସୂଚନା ଅନୁଯାୟୀ ଉକ୍ତ ମଦ ଦୋକାନର ମାଲିକ ମାହାଙ୍ଗା ଥାନା ବରଅଠା ଗ୍ରାମର ସଞ୍ଜୟ ମହାପାତ୍ର ଏନେଇ ରବିବାର ଦିନ ଥାନାରେ ଅଭିଯୋଗ କରିଥିଲେ । ତାଙ୍କ ଦୋକାନରେ ପୂର୍ବରୁ ଜଣେ କର୍ମଚାରୀ ଭାବେ କାର୍ଯ୍ୟ କରୁଥିବା ଦୀପକ ରାଉତ ରବିବାର ସଂଧ୍ୟାରେ ଏକ ବାଇକ୍ରେ ଆସି ଦୋକାନ କାଉଣ୍ଟର ଉପରକୁ ଏକ ଶକ୍ତିଶାଳୀ ବୋମା ଫିଙ୍ଗି ଘଟଣାସ୍ଥଳରୁ ଫେରାର ହୋଇ ଯାଇଥିଲା ।
ବୋମାଟି ଦୋକାନ ସମ୍ମୁଖରେ ପଡ଼ି ଫୁଟି ଯିବାରୁ କାଉଣ୍ଟରରେ ବସିଥିବା ରାଜକିଶୋର ସାମଲ ଓ ନୃସିଂହ ବେହୁରା ନାମକ ଦୁଇଜଣ କର୍ମଚାରୀ ଅଳ୍ପକେ ରକ୍ଷା ପାଇ ଯାଇଥିଲେ । ଦୋକାନ ମାଲିକ ସଂଜୟ ଅଭିଯୋଗ କରିଛନ୍ତିଯେ ଅଭିଯୁକ୍ତ ଦୀପକ ଗ୍ରାହକ ମାନଙ୍କୁ ଦୁର୍ବବହାର କରିବା, କାଉଣ୍ଟରରୁ ଟଙ୍କା ହଡ଼ପ କରିବା ଓ ବିଭିନ୍ନ ଅପରାଧୀକ କାର୍ଯ୍ୟ କରୁଥିବା ଜାଣିବା ପରେ ସେ ଘଟଣା ଦିନ ଦୀପକକୁ କାର୍ଯ୍ୟରୁ ବାହାର କରି ଦେଇଥିଲେ । ଦୀପକକୁ ଧରିବା ପାଇଁ ପୁଲିସ ଏକ ଟିମ୍ ଗଠନ କରି ବିଭିନ୍ନ ସ୍ଥାନରେ ଚଢ଼ଉ କରି ସେମାବାର ସକାଳେ ତାକୁ ଗିରଫ କରି କୋର୍ଟ ଚାଲାଣ କରିଛନ୍ତି । ଅଭିଯୁକ୍ତ ଦୀପକ ନାମରେ ପୂର୍ବରୁ ଚୌଦ୍ୱାର ଥାନାରେ ଚୋରି ,ଡକାୟତି, ଦାଦାଗିରି, ବିଷ୍ଫୋରକ ସାମଗ୍ରୀ ବ୍ୟବହାର ଆଦି ୭ଟି ମାମଲା ରହିଥିବା ଥାନା ସୁତ୍ରରୁ ପ୍ରକାଶ ।
