ନର୍ଲା: ନର୍ଲା ବ୍ଲକ୍ ଅଧିନସ୍ଥ ବଡଧାରପୁର ଗ୍ରାମ ପଞ୍ଚାୟତର ସାପଦୁହୁନି ଗ୍ରାମରେ ଏକ ଅଭାବନୀୟ ଘଟଣା ଘଟିଛି । ଗାଁ ମଝିରେ ରହିଥିବା ବିଦ୍ୟୁତ୍ ଟ୍ରାନ୍ସଫରମରରେ ଜଣେ ଯୁବକଙ୍କ ମୃତଦେହ ଲାଗି ରହିଥିବା ଦେଖିବାକୁ ମିଳିଛି । ସୂଚନା ଅନୁଯାୟୀ ଗତକାଲି (ରବିବାର) ଅପରାହ୍ନ ୪ଟା ବେଳେ କାଳ ବୈଶାଖୀ ପ୍ରଭାବରେ ଝଡତୋଫାନ ହୋଇଥିଲା । ପରେ ଲାଇନ କଟିଯାଇଥିଲା । ଟ୍ରାନ୍ସଫମରୁ ଫିୟୁଜ କଟିଯାଇଥିବା ଜାଣି ଗ୍ରାମର ଯୁବକ ଲମ୍ବୋଦର ଦୋରା(୨୫) ଟ୍ରାନ୍ସଫର୍ମର ଉପରକୁ ଚଢି ଫିୟୁଜ ତାର ବାନ୍ଧୁଥିଲେ । ସେତେବେଳେ ହଠାତ୍ ଲାଇନ ଆସିଯିବାରୁ ବିଦ୍ୟୁତ୍ ଆଘାତରେ ଟ୍ରାନ୍ସଫରମରରେ ଲାଗି ମୃତ୍ୟୁବରଣ ହୋଇଥିବା ଜଣାପଡିଛି । ଗ୍ରାମବାସୀ ମାନେ ଏହି ଅଭାବନୀୟ ଘଟଣା ଘଟିବା ପରେ ନର୍ଲା ପୋଲିସକୁ ବାରମ୍ବାର ଫୋନ କରୁଥିଲେ ମଧ୍ୟ ପୋଲିସ ପହଞ୍ଚି ନଥିଲେ । ଶେଷରେ ରାତି ୧୧.୩୦ରେ ନର୍ଲା ପୋଲିସ ଘଟଣା ସ୍ଥଳରେ ପହଞ୍ଚି ଗ୍ରାମବାସୀଙ୍କ ସହାୟତାରେ ଯୁବକ ଲମ୍ବୋଦର ଦୋରାଙ୍କ ମୃତଦେହକୁ ଟ୍ରାନ୍ସଫର୍ମରରୁ ଓହ୍ଲାଇଥିଲା । ଆଜି ସକାଳେ ଶବ ବ୍ୟବଚ୍ଛେଦ ପାଇଁ ପଠାଯାଇଥିବା ଜଣାପଡ଼ିଛି ।
Comments are closed.