ଆଠଗଡ: ଆଠଗଡରେ ପ୍ରତିଷ୍ଠିତ କଟକ ଆସୋସିଏସନ ପକ୍ଷରୁ ସମସରପୁର କଲ୍ୟାଣ ମଣ୍ଡପରେ ଆୟୋଜିତ ଏକ ଉତ୍ସବରେ ୧୧ଜଣ ତାଇକୋଣ୍ଡୋ ଖେଳାଳିଙ୍କୁ ଦକ୍ଷିଣ କୋରିଆରୁ ମିଳିଥିବା ବ୍ଲାକ୍ବେଲ୍ଟ ଓ ପ୍ରମାଣପତ୍ର ପ୍ରଦାନ କରାଯାଇଛି । ରବିବାର ସମସରପୁର କଲ୍ୟାଣ ମଣ୍ଡପଠାରେ ଶିକ୍ଷକ ନୀଳମଣି ନାୟକଙ୍କ ସଂଯୋଜନାରେ ଅନୁଷ୍ଠିତ ଏହି କାର୍ଯ୍ୟକ୍ରମର ମୁଖ୍ୟଅତିଥି ତହସିଲଦାର ପ୍ରିୟବ୍ରତ ଦାସ, ଜିଲ୍ଲା ପରିଷଦ ସଭ୍ୟା ଶାନ୍ତିଲତା ବେହେରା, ସରପଞ୍ଚ ପୂର୍ଣ୍ଣଚନ୍ଦ୍ର ରାଉତ, ସମିତି ସଭ୍ୟା ଲିଲି ମହାପାତ୍ର, ଶିକ୍ଷକ ଅଶୋକ କୁମାର ସାହୁ, ସଂଘର ରାଜ୍ୟସ୍ତରୀୟ ସଂପାଦକ ରବିନାରାୟଣ ପାଣିଗ୍ରାହୀ, କାର୍ଯ୍ୟକାରୀ ସଭାପତି ବିଜୟ କୁମାର ଜେନା ପ୍ରମୁଖ ସମ୍ମାନିତ ଅତିଥି ଭାବେ ଯୋଗଦେଇ ତାଇକୋଣ୍ଡୋ ଖେଳାଳୀମାନଙ୍କର ଏହି ସଫଳତା କେବଳ ଆଠଗଡ ବା କଟକ ନୁହେଁ ବରଂ ରାଜ୍ୟପାଇଁ ଗୌରବର କଥା ବୋଲି ମତବ୍ୟକ୍ତ କରିଥିଲେ ।
ଖେଳାଳୀମାନଙ୍କୁ ଅଧିକ ପ୍ରୋତ୍ସାହନ ମିଳିଲେ ସେମାନେ ଆନ୍ତର୍ଜାତୀୟସ୍ତରରେ ମଧ୍ୟ ଉତ୍କୃଷ୍ଟ ଖେଳ ପ୍ରଦର୍ଶନ କରି ଦେଶ ପାଇଁ ସୁନାମ ଆଣିପାରିବେ ବୋଲି ଅତିଥିଗଣ ମତବ୍ୟକ୍ତ କରିଥିଲେ । ଏଥିରେ ଉନ୍ନତ ଖେଳ ପ୍ରଦର୍ଶନ, ପ୍ରଶିକ୍ଷଣ ସହିତ ଖେଳ ସଂପର୍କୀତ ପରୀକ୍ଷାରେ ସଫଳତା ହାସଲ କରିଥିବାରୁ ୧୧ଜଣ ଖେଳାଳୀଙ୍କୁ ଦକ୍ଷିଣ କୋରିଆରୁ ମିଳିଥିବା ବ୍ଲାକ୍ବେଲ୍ଟ ଓ ପ୍ରମାଣପତ୍ର ମୁଖ୍ୟଅତିଥି ପ୍ରଦାନ କରିଥିଲେ । ସେମାନଙ୍କୁ ପ୍ରଶିକ୍ଷଣ ଦେଇଥିବା ପ୍ରଶିକ୍ଷକ ସୁଧାକର ଜେନା ଓ ରଜନୀକାନ୍ତ ବେହେରାଙ୍କ ସମେତ ଆଠଗଡ, ତିଗିରିଆ, କାମାକ୍ଷାନଗର ଓ ଢେଙ୍କାନାଳର ୧୪୬ଜଣ ତାଇକୋଣ୍ଡୋ ଖେଳାଳି ଯୋଗଦାନ କରିଥିଲେ ।
