ପିପିଲି :ପିପିଲି ବ୍ଲକ ଅନ୍ତର୍ଗତ ଯଶୁଆପୁର ପଞ୍ଚାୟତ ଅଞ୍ଚଳର ଜଣେ ଦିବ୍ୟାଙ୍ଗ ପାମ୍ପଡ ବ୍ୟବସାୟୀ ରାଜକିଶୋର ସ୍ୱାଇଁଙ୍କୁ ବ୍ୟାଟେରୀ ଚାଳିତ ଟ୍ରାଇ ସ୍କୁଟର ଉପହାର ଦେଇଛନ୍ତି ବିଧାୟକ ରୁଦ୍ରପ୍ରତାପ ମହାରଥୀ । ପବିତ୍ର ଉତ୍କଳ ଦିବସ ଅବସରରେ ବିଧାୟକଙ୍କ ଠାରୁ ଏହି ଉପହାର ମିଳିବା ପରେ ରାଜକିଶୋରଙ୍କ ପରିବାରରେ ଆନନ୍ଦର ଲହରି ଖେଳିଯାଇଛି ।
କୁମାରେଶ୍ୱର ଗ୍ରାମର ରାଜକିଶୋର ସ୍ୱାଇଁ ଜଣେ ଦିବ୍ୟାଙ୍ଗ ବ୍ୟକ୍ତି ହୋଇଥିବା ବେଳେ ସେ ନିଜର ଭଙ୍ଗା ସାଇକେଲ୍ରେ ନଳି ଓ ପାମ୍ପଡ ବିକ୍ରି କରି ପରିବାର ପ୍ରତିପୋଷଣ କରିଥାନ୍ତି । ଗତ ତ୍ରିସ୍ତରୀୟ ପଞ୍ଚାୟତ ନିର୍ବାଚନ ପ୍ରଚାର ସମୟରେ ରାଜକିଶୋରଙ୍କ ଠାରୁ ରାସ୍ତା ଉପରେ ବିଧାୟକ ରୁଦ୍ରପ୍ରତାପ ନଳିପାମ୍ପଡ କିଣି ଖାଇବା ସହ ତାଙ୍କ ଦୁଃଖ ଶୁଣିଥିଲେ । ତାଙ୍କୁ ଏକ ବ୍ୟାଟେରୀ ଚାଳିତ ଟ୍ରାଇ ସ୍କୁଟର ପ୍ରଦାନ କରିବାକୁ ଶ୍ରୀମହାରଥୀ ସେତେବେଳେ ପ୍ରତିଶୃତି ଦେଇଥିଲେ । ତଦନୁଯାଇ ପବିତ୍ର ଉତ୍କଳ ଦିବସ ଅବସରରେ ଗାୟତ୍ରୀ ଦେବୀ ଗୃପ ସହାୟତାରେ ବିଧାୟକ ଶ୍ରୀମହାରଥୀ ରାଜକିଶୋରଙ୍କୁ ଶୁକ୍ରବାର ଅପରାହ୍ନରେ ସ୍ଥାନୀୟ କୁମାରେଶ୍ୱର ମେଳଣ ପଡିଆ ଠାରେ ଏହି ବ୍ୟାଟେରୀ ଚାଳିତ ଟ୍ରାଇ ସ୍କୁଟରକୁ ଉପହାର ଦେଇଥିଲେ ।
ଏହି କାର୍ଯ୍ୟକ୍ରମରେ ଅନ୍ୟମାନଙ୍କ ମଧ୍ୟରେ ବିଧାୟକଙ୍କ ଧର୍ମପତ୍ନୀ ଆଇନଜୀବୀ ଜାଗୃତୀ ପଣ୍ଡା ମହାରଥୀ, ଗାୟତ୍ରୀ ଦେବୀ ଗ୍ରୁପ ନିର୍ଦ୍ଦେଶିକା ନିରୁପମା ବିଶ୍ୱାଳ, ଭାଇସ ଚ୍ୟାୟାରମ୍ୟାନ ଚିତ୍ତରଞ୍ଜନ ଦେବତା, ଜିଲା ପରିଷଦ ସଭ୍ୟ ଧରଣୀଧର ସାହୁ, ପୁରୀ ଜିଲା ବିଜେଡି ସାଧାରଣ ସଂପାଦକ କିଶୋର ଛୋଟରାୟ, ସଂପାଦକ ସତ୍ୟଜିତ ରାୟଚୌଧୁରୀ, ଜିଲା ଯୁବ ବିଜେଡି ସଭାପତି ନାରାୟଣ ସ୍ୱାଇଁ, ପୂର୍ବତନ ଜିଲା ପରିଷଦ ସଭ୍ୟ ଦେବାଶିଷ ନନ୍ଦ, ଡେଲାଙ୍ଗ ବ୍ଲକ ଅଧ୍ୟକ୍ଷା ବାସନ୍ତୀ ସାହୁ, ସାମ୍ବାଦିକ ରାକେଶ ରୋଶନ ମହାନ୍ତି, ସମିତିସଭ୍ୟ ରଶ୍ମୀରଞ୍ଜନ ଭଟ୍ଟ, ଯୁବନେତା ଆଶିଷ ବରାଳ, ଲିଙ୍କନ ପଟ୍ଟନାୟକ ପ୍ରମୁଖ ଉପସ୍ଥିତ ଥିଲେ ।
