ଲକ୍ଷ୍ନୌ : ଭାରତ-ଶ୍ରୀଲଙ୍କା ମଧ୍ୟରେ ୩ ଟିକିଆ ଟି-୨୦ ଶୃଙ୍ଗଳାର ପ୍ରଥମ ମ୍ୟାଚ୍ ଆଉ କିଛି ସମୟ ପରେ ଲକ୍ଷ୍ନୌରେ ଆରମ୍ଭ ହେବ। ରୋହିତ ଶର୍ମାଙ୍କ ନେତୃତ୍ବରେ ଭାରତୀୟ ଦଳ ପଡ଼ିଆକୁ ଓହ୍ଲାଇବ। ପ୍ରଥମେ ନ୍ୟୁଜିଲାଣ୍ଡ ଓ ପରେ ଓ୍ୱେଷ୍ଟଇଣ୍ଡିଜକୁ ଟି-୨୦ ଶୃଙ୍ଗଳାରେ ପରାସ୍ତ କରିବା ପରେ ଦୃଢ ମନୋବଳ ନେଇ ଭାରତ ଶ୍ରୀଲଙ୍କା ବିପକ୍ଷରେ ଖେଳିବ। ସେହିପରି ଓ୍ୱେଷ୍ଟଇଣ୍ଡିଜକୁ ଉଭୟ ଦିନିକିଆ ଓ ଟି-୨୦ ଶୃଙ୍ଗଳାରେ ପରାସ୍ତ କରିଥିବା ଭାରତ ଏବେ ବିଶ୍ବ ଟି-୨୦ ମାନ୍ୟତାରେ ଶୀର୍ଷରେ ରହିଛି। ମୋଟାମୋଟି ଭାବେ ଭାରତ ଟି-୨୦ ବିଶ୍ବକପ୍ ପାଇଁ ନିଜର ଜୋରଦାର ପ୍ରସ୍ତୁତି ଜାରି ରଖିଛି।
ତେବେ ଶ୍ରୀଲଙ୍କା ବିପକ୍ଷରେ ଏହି ମ୍ୟାଚ ପୂର୍ବରୁ ଟିମ୍ ଇଣ୍ଡିଆକୁ ବଡ଼ ଝଟକା ଲାଗିଛି । ଆହତ କାରଣରୁ ଦଳରୁ ସୂର୍ଯ୍ୟ କୁମାର ଯାଦବ ଓ ଦୀପକ ଚହର ବାଦ୍ ପଡ଼ିଛନ୍ତି । ପୂର୍ବତନ ଅଧିନାୟକ ବିରାଟ କୋହଲି ଓ ଋଷଭ ପନ୍ତଙ୍କୁ ମଧ୍ୟ ବିଶ୍ରାମ ଦିଆଯାଇଛି । ତେଣୁ ଆଜି ମ୍ୟାଚରେ ଋତୁରାଜ ଗାଏକ୍ବାଡ୍, ଶ୍ରେୟସ୍ ଆୟାର୍, ସଞ୍ଜୁ ସାମସନଙ୍କୁ ଦଳରେ ସ୍ଥାନ ମିଳିବାର ସମ୍ଭାବନା ରହିଛି।
