କାଇରୋ: ସୁଦାନର ପଶ୍ଚିମ କୋର୍ଡୋଫାନ୍ ଅଞ୍ଚଳରେ ଥିବା ସୁନା ଖଣିରେ ବଡ଼ ଧରଣର ଅଘଟଣ । ଖଣିର କିଛି ଅଂଶ ଭୁଶୁଡ଼ି ପଡ଼ିବା ଫଳରେ ୩୮ଜଣ ଶ୍ରମିକଙ୍କ ମୃତ୍ୟୁ ହୋଇଛି । ସୂଚନା ଅନୁସାରେ ଶ୍ରମିକ ମାନେ ସୁନା ଖଣିରେ କାମ କରୁଥିଲେ । ହଠାତ୍ ଖଣିର କିଛି ଅଂଶ ଭୁଶୁଡ଼ି ପଡ଼ିଥିଲା । ଫଳରେ ମାଟି ତଳେ ଚାପି ହୋଇ ୩୮ଜଣଙ୍କ ମୃତ୍ୟୁ ହୋଇଥିଲା ।
ଦୁର୍ଘଟଣାକୁ ନେଇ ସୁଦାନ ସରକାର ବିବୃତି ରଖିଛନ୍ତି । ସରକାର କହିଛନ୍ତି କି ଖଣିଟି ବନ୍ଦ ରହିଥିଲା । ଗୋଟିଏ କମ୍ପାନୀ ଏହାକୁ ପରିଚାଳନା ଦାୟିତ୍ୱ ନେଇଥିଲା । ହେଲେ ବର୍ତ୍ତମାନ ଏହି ଖଣି ଖୋଲିବାର ଅନୁମତି ନଥିଲା । ଅନୁମତି ନଥିବା ପରେ ବି ଖଣି ଭିତରେ କିପରି କାମ କରାଯାଉଥିଲା ତାହା ତଦନ୍ତ ହେବ । ଏଥିପାଇଁ ତଦନ୍ତ ନିର୍ଦ୍ଦେଶ ଦିଆଯାଇଛି । ତେବେ ଖଣିମଧ୍ୟରେ କିଛି ଲୋକ ଫସି ରହିଥିବା ମଧ୍ୟ ଅନୁମାନ କରାଯାଉଛି ।
