ନୂଆଦିଲ୍ଲୀ: ଗୁଇନ୍ଦାଗିରି ଅଭିଯୋଗରେ ଦୋଷମୁକ୍ତ ହୋଇଥିବା ତଥା ଭାରତୀୟ ଅନ୍ତରୀକ୍ଷ ଅନୁସନ୍ଧାନ ସଂଗଠନ(ଇସ୍ରୋ)ର ପ୍ରାକ୍ତନ ବୈଜ୍ଞାନିକ ନାମ୍ବି ନାରାୟଣନଙ୍କୁ ୫୦ଲକ୍ଷ ଟଙ୍କା କ୍ଷତିପୂରଣ ପ୍ରଦାନ କରିବାକୁ ସୁପ୍ରିମ କୋର୍ଟ ନିର୍ଦେଶ ଦେଇଛନ୍ତି। ଅପରପକ୍ଷରେ ନାମ୍ବି ନାରାୟଣନଙ୍କୁ ଏଭଳି ଗୁରୁତ୍ୱପୂର୍ଣ୍ଣ ଅଭିଯୋଗରେ ଫସେଇ ଥିବା କେରଳର ପୁଲିସ ଅଧିକାରୀଙ୍କ ଅଭିପ୍ରାୟ ସମ୍ପର୍କରେ ତଦନ୍ତ ପାଇଁ ନ୍ୟାୟିକ କମିଟି ଗଠନ କରିବାକୁ କୋର୍ଟ ନିର୍ଦେଶ ଦେଇଛନ୍ତି।
ଏହି କମିଟିରେ କେନ୍ଦ୍ର ଓ କେରଳ ସରକାରଙ୍କ ସଦସ୍ୟ ରହିବେ। କମିଟିର ଅଧ୍ୟକ୍ଷତା ପ୍ରାକ୍ତନ ସୁପ୍ରିମକୋର୍ଟ ବିଚାରପତି ଡିକେ ଜେନସ୍ କରିବେ। ପୂର୍ବରୁ ନାମ୍ବି ନାରାୟଣନଙ୍କ ଆବେଦନ ଉପରେ ହୋଇଥିବା ଶୁଣାଣି ପରେ ସୁପ୍ରିମ କୋର୍ଟ ରାୟକୁ ସଂରକ୍ଷିତ ରଖିଥିଲେ। ନାମ୍ବି ନାରାୟଣନ ତାଙ୍କ ଆବେଦନରେ କେରଳର ପ୍ରାକ୍ତନ ଡିଜିପି ସିବି ମ୍ୟାଥୁ ଓ ଅନ୍ୟମାନଙ୍କ ନାମରେ ପଦକ୍ଷେପ ପାଇଁ ଗୁହାରୀ କରିଥିଲେ। କାରଣ ସିବି ମ୍ୟାଥୁ ଏହି ଗୁଇନ୍ଦାଗିରି ମାମଲାର ତଦନ୍ତ କରିଥିଲେ। ଏହି ମାମଲାରେ ନାମ୍ବି ନାରାୟଣନଙ୍କୁ କେରଳ ହାଇକୋର୍ଟ ଦୋଷୀ ସାବ୍ୟସ୍ତ କରିଥିଲେ। ସିବି ମ୍ୟାଥୁ ଓ ଅନ୍ୟ ଦୁଇ ପୁଲିସ ଅଧିକାରୀ ଅବସର ହୋଇ ଯାଇଥିବାରୁ ସେମାନଙ୍କ ଉପରେ ତଦନ୍ତର ଆବଶ୍ୟକତା ନାହିଁ ବୋଲି କେରଳ ହାଇକୋର୍ଟ କହିଥିଲେ।
ନାମ୍ବି ନାରାୟଣନ କେରଳ ଉଚ୍ଚ ନ୍ୟାୟାଳୟର ରାୟକୁ ଚ୍ୟାଲେଞ୍ଜ କରି ସୁପ୍ରିମ କୋର୍ଟର ଦ୍ୱାରସ୍ଥ ହୋଇଥିଲେ। ନାମ୍ବି ନାରାୟଣନଙ୍କୁ ଗିରଫ ପାଇଁ ଉପରୋକ୍ତ ପୁଲିସ ଅଧିକାରୀ ଦାୟୀ ବୋଲି ସିବିଆଇ କୋର୍ଟରେ ସତ୍ୟପାଠ ଦାଖଲ କରିଥିଲା।
୧୯୯୮ରେ ସୁପ୍ରିମ କୋର୍ଟ ଏହି ମାମଲାରେ ନାମ୍ବି ନାରାୟଣନଙ୍କୁ ନିର୍ଦୋଷ ଘୋଷଣା କରିବା ସହିତ ତାଙ୍କୁ ଏକ ଲକ୍ଷ ଟଙ୍କା କ୍ଷତିପୂରଣ ପ୍ରଦାନ କରିବାକୁ କେରଳ ସରକାରଙ୍କୁ ନିର୍ଦେଶ ଦେଇଥିଲେ। ପରେ ବୈଜ୍ଞାନିକ ନାମ୍ବି ରାଷ୍ଟ୍ରୀୟ ମାନବାଧିକାର ଆୟୋଗର ଦ୍ୱାରସ୍ଥ ହେବା ସହ ରାଜ୍ୟ ସରକାରଙ୍କଠାରୁ ଅଧିକ କ୍ଷତିପୂରଣ ଦାବି କରିଥିଲେ। ରାଷ୍ଟ୍ରୀୟ ମାନବାଧିକାର ଆୟୋଗ ନାମ୍ବି ନାରାୟଣନଙ୍କୁ ୧୦ଲକ୍ଷ ଟଙ୍କା କ୍ଷତିପୂରଣ ଦେବାକୁ ରାଜ୍ୟ ରକାରଙ୍କୁ ନିର୍ଦେଶ ଦେଇଥିଲେ।
