ନୂଆଦିଲ୍ଲୀ : ଗୁଜରାଟର ନର୍ମଦା ଜିଲ୍ଲାରେ ଆସନ୍ତା ମାସ ୩୧ ତାରିଖରେ ଲୌହମାନବ ସର୍ଦ୍ଦାର୍ ବଲ୍ଲଭ ଭାଇ ପଟେଲ୍ଙ୍କର ଏକ ବିଶାଳ ପ୍ରତିମୂର୍ତ୍ତି ଉନ୍ମୋଚିତ ହେବ। ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଏହି ମହାନ୍ ରାଜ ନେତା ତଥା ସ୍ୱାଧୀନତା ସଂଗ୍ରାମୀ ସର୍ଦ୍ଦାର୍ ବଲ୍ଲଭ ଭାଇ ପଟେଲ୍ଙ୍କ ଜୟନ୍ତ୍ରୀ ଅବସରରେ ଏଇ ବିଶାଳ ପ୍ରତିମୂର୍ତ୍ତିକୁ ଅନାବରଣ କରିବେ। ଏକତାର ନିଦର୍ଶନ ସ୍ୱରୂପ ‘ଷ୍ଟାଚ୍ୟୁ ଅଫ ୟୁନିଟି’ ନାମରେ ଏହି ବିଶାଳ ପ୍ରତିମୂର୍ତ୍ତି ହେବ ପୃଥିବୀର ସବୁଠାରୁ ବଡ଼ ସ୍ମାରକ ସ୍ଥଳ।
ସର୍ଦ୍ଦାର ସରୋବର ନଦୀବନ୍ଧର ଏକ କିଲୋମିଟର ଦୂରତାରେ ନର୍ମଦା ନଦୀରେ ଥିବା ଏକ ଛୋଟ ଦ୍ୱୀପ ନିକଟରେ ସାଧୁ ବେଟ୍ଠାରେ ଏହି ପ୍ରତିମୂର୍ତ୍ତି ନିର୍ମାଣ କରାଯାଇଛି । ଗୁଜରାଟ ମୁଖ୍ୟମନ୍ତ୍ରୀ ବିଜୟ ରୂପାନୀ ନୂଆଦିଲ୍ଲୀରେ ଗଣମାଧ୍ୟମକୁ ଏହି ସୂଚନା ଦେଇଛନ୍ତି । କେତେକ ଲୋକ ଦେଶକୁ ଭାଗ ଭାଗ କରିବାକୁ ଚେଷ୍ଟିତ ଥିବାବେଳେ ସର୍ଦ୍ଦାର ପଟେଲ୍ଙ୍କର ଏହି ବିଶାଳ ପ୍ରତିମୂର୍ତ୍ତି ଏକତାର ଏକ ସ୍ମାରକୀ ହୋଇ ରହିବ ବୋଲି ସେ କହିଛନ୍ତି।
