ଦୁଇ ଭଉଣୀ ଗୋଟିଏ ଦିନରେ ଗର୍ଭବତୀ ହେଲେ । ଗୋଟିଏ ଦିନରେ ସନ୍ତାନ ଜନ୍ମ କଲେ । ପୁଣି ଉଭୟ ଯାଆଁଳା ଶିଶୁ ଜନ୍ମ ଦେଲେ। ଆଉ ସଂଯୋଗ ବଶତଃ ଚାରୋଟି ଯାକ ସନ୍ତାନ ଦେଖିବାକୁ ଏକାଭଳି। ଜଣଙ୍କ ଚେହେରା ଅନ୍ୟ ଜଣଙ୍କ ସହିତ ମିଶି ଯାଉଛି। ଯଦିଓ ସେମାନଙ୍କର ମାଆ ସଂପର୍କରେ ଦୁଇ ଭଉଣୀ, ତେବେ ପିଲାମାନଙ୍କର ଚେହେରା ଏକାଭଳି ହେବା ସମସ୍ତଙ୍କୁ ଆଶ୍ଚର୍ଯ୍ୟ କରିଛି। ତେବେ ଏହା ଆଶ୍ଚର୍ଯ୍ୟ ହେଲେ ମଧ୍ୟ ସତ୍ୟ।
ହେଲେ ଆପଣ ଭାବୁଥିବେ ଏଭଳି ଚମତ୍କାର ହେଲା କେମିତି। ଆଉ ଏଭଳି ଚମତ୍କାର ଘଟଣା ଘଟିଛି ଆମେରିକାର ଓହିଓ ଅଞ୍ଚଳରେ। ଏଠାରେ ରହୁଥିବା ଏନି ମାଆ ହୋଇ ପାରୁ ନ ଥିଲେ। ତାଙ୍କ ସ୍ୱାମୀ ଜେବି ମଧ୍ୟ ଏହି କଥାକୁ ନେଇ ମନ ଦୁଃଖରେ ଥିଲେ। ହେଲେ ଏନି ଏହି କଥା ନିଜ ବଡ଼ ଭଉଣୀ କ୍ରିସିକୁ କହିଲେ। ତେବେ ଅନେକ ଥର କହିବା ପରେ କ୍ରିସି, ଏନି-ଜେବିଙ୍କ ପିଲାଙ୍କ ପାଇଁ ‘ସରୋଗେଟ ମଦର’ ହେବାକୁ ରାଜି ହୋଇଗଲେ।
ତିନି ଜଣ ଯାକ ଡ଼ାକ୍ତରଙ୍କ ପରାମର୍ଶ କଲେ। ସେହିପରି ଏହି ପ୍ରକ୍ରିୟା ସହିତ ଏନିଙ୍କୁ ଶେଷ ପ୍ରୟାସ କରିବା ପାଇଁ ଡ଼ାକ୍ତର ପରାମର୍ଶ ଦେଲେ। ତେବେ ସୌଭାଗ୍ୟବଶତଃ ଏଥର ଏନି ମଧ୍ୟ ଗର୍ଭବତୀ ହେଲେ। ଦୁଇ ଭଉଣୀ ଗୋଟିଏ ଦିନରେ ଗର୍ଭବତୀ ହେଲେ। ଗୋଟିଏ ଦିନରେ ମଧ୍ୟ ସନ୍ତାନ ଜନ୍ମ କଲେ। ତେବେ ଚାରୋଟି ଯାକ ସନ୍ତାନ ଦେଖିବାକୁ ଏକା ଭଳି କାରଣ, ସେମାନଙ୍କ ମାଆ ଦୁଇଜଣ ହେଲେ ମଧ୍ୟ ପିତା ହେଉଛନ୍ତି ଜଣେ। ଏବେ ଚାରୋଟି ସନ୍ତାନକୁ ନେଇ ଏନି ଓ ଜେବି ବେଶ ଖୁସିରେ ଅଛନ୍ତି। ଯଦିଓ ସେମାନଙ୍କ ଲାଳନ ପାଳନ କରିବା କଷ୍ଟକର ହୋଇ ପଡିଛି, ତଥାପି ନର୍ସଙ୍କ ସହାୟତା ନେଇ ଏନି ନିଜର ଚାରୋଟି ପିଲାଙ୍କ ଯତ୍ନ ନେଉଛନ୍ତି।