କାଶୀପୁର: ଦୃଢ ଇଚ୍ଛା ଶକ୍ତି ଆଗରେ ହାର ମାନିଛି ବୟସ। ପାଠପଢା ଲାଗି ପାହାଡ ଉପରେ ନିଜ ବାପାଙ୍କ ସହାୟତାରେ କୁଡିଆ ବନାଇ ପାଠ ପଢୁଛନ୍ତି ଛାତ୍ର। କରୋନା କାଳରେ ସରକାର ଅନଲାଇନ ମାଧ୍ୟମରେ ଛାତ୍ରଛାତ୍ରୀଙ୍କ ପାଠପଢାକୁ ଗୁରୁତ୍ବ ଦେଇଛନ୍ତି। ଉପାନ୍ତ ଅଞ୍ଚଳ ରାୟଗଡା ଜିଲାର କାଶୀପୁର ବ୍ଲକର ଅନେକ ଗ୍ରାମରେ ନେଟଓ୍ବର୍କ ଆସୁ ନ ଥିବାରୁ ନେଟଓ୍ବର୍କ ଖୋଜି ଖୋଜି ପାହାଡ ଚଢୁଥିବା ବେଳେ ଅନେକ ପାହାଡ଼ ଉପରେ ଥିବା ଗଛରେ ଚଢି ନେଟଓ୍ବର୍କ ଆସିଲେ ପଢୁଛନ୍ତି। ଏଭଳି ସମୟରେ ଜଣେ କୁନି ଛାତ୍ର ପାହାଡ଼ ଉପରେ ନେଟଓ୍ବର୍କ ଆସୁଥିବା ସ୍ଥାନରେ କୁଡିଆ ବନାଇ ପାଠ ପଢୁବାର ମନବୃତ୍ତି ସମସ୍ତଙ୍କୁ ଚକିତ କରିଦେଇଛି।
ପାଠପଢା ଜୀବନର ଆଲୋକର ମାର୍ଗ ବୋଲି ଏହି ଛାତ୍ର ଜଣଙ୍କ ବୁଝିପାରିଛନ୍ତି। ରାୟଗଡା ଜିଲା ଆଦିବାସୀ ଅଧ୍ୟୁସିତ କାଶୀପୁର ବ୍ଲକ ଅଣ୍ଡିରାକଞ୍ଚ ଗ୍ରାମର ସୁଭମ କୁମାର ମୁଦୁଲିଙ୍କ ୬ ବର୍ଷର ପୁଅ ସୋମନାଥ ମଦୁଲି। ସୋମନାଥ ମୁଦୁଲି ଉତ୍କଳ ଆଲୁମିନା ଆଦିତ୍ୟ ବିର୍ଲା ପବ୍ଲିକ ବିଦ୍ୟାଳୟର ଷ୍ଟାଣ୍ଡାଡ ୧ରେ ପାଠ ପଢୁଛନ୍ତି। କରୋନା କାଳରେ ବିଦ୍ୟାଳୟ ବନ୍ଦ ହୋଇଯିବା ଫଳରେ ସେ ବର୍ତ୍ତମାନ ନିଜ ଗ୍ରାମ ଅଣ୍ଡିରାକଞ୍ଚଠାରେ ରହୁଛନ୍ତି। ସରକାର ପାଠପଢା ପାଇଁ ଯେତେବେଳେ ଅନଲାଇନକୁ ଗୁରୁତ୍ବ ଦେଲେ ସେତେବେଳେ ସେ ନେଟଓ୍ବର୍କ ଖୋଜି ଖୋଜି ଗ୍ରାମଠାରୁ ପ୍ରାୟ ୧ କିଲୋମିଟର ଦୂରରେ ଥିବା ଏକ ପାହାଡ ଉପରେ ଚଢି ନେଟଓ୍ବର୍କ ପାଇ ଅନଲାଇନ ପାଠପଢୁଥିଲେ। କିନ୍ତୁ ଗତ କିଛି ଦିନ ଧରି କାଶୀପୁର ବ୍ଲକରେ ପ୍ରବଳ ବର୍ଷା ହେବେ ଯୋଗୁଁ ସେ ପାହାଡ ଉପରକୁ ଯାଇ ପାଠପଡି ପାରୁନଥିଲେ। ଫଳରେ ଛାତ୍ର ଜଣଙ୍କ ତାଙ୍କ ବାପାଙ୍କ ସହାୟତାରେ ନେଟଓ୍ବର୍କ ଆସୁଥିବା ସ୍ଥାନରେ ପଥର, ଗଛର ଡାଳ, ପତ୍ର ସାହାଯ୍ୟରେ ଏକ ଛୋଟ କୁଡିଆ ବନାଇ ଏବେ ସେଠାରେ ଅନଲାଇନ ପାଠ ପଢୁଛନ୍ତି। ଏହା ସହ ସୋମନାଥ ସମସ୍ତଙ୍କ ପାଇଁ ପ୍ରେରଣା ପାଲଟିଛନ୍ତି।
Comments are closed.