ଟୋକିଓ: ଆରମ୍ଭ ହୋଇଛି କ୍ରୀଡ଼ା ମହାକୁମ୍ଭ ଟୋକିଓ ଅଲିମ୍ପିକ୍ସ। ପ୍ରତିଯୋଗିତାର ଦ୍ବିତୀୟ ଦିବସରେ ଭାରତୀୟ ହକି ଦଳ ଅଭିଯାନ ଆରମ୍ଭ କରିବ। ପୁଲ-ଏ ରେ ସ୍ଥାନ ପାଇଥିବା ଭାରତୀୟ ପୁରୁଷ ହକି ଦଳ ଶନିବାର ପ୍ରଥମ ମ୍ୟାଚ ନ୍ୟୁଜିଲାଣ୍ଡ ସହିତ ଖେଳିବ। ମନପ୍ରୀତ୍ ସିଂହଙ୍କ ନେତୃତ୍ବାଧୀନ ଭାରତୀୟ ଦଳ ଚଳିତ ଥର ପୋଡ଼ିୟମ ଲକ୍ଷ୍ୟ ନେଇ ଟୋକିଓ ଗସ୍ତ କରିଛି। ବିଶ୍ବ ମାନ୍ୟତାର ୪ର୍ଥ ସ୍ଥାନରେ ଥିବା ଭାରତ ବିପକ୍ଷ ନ୍ୟୁଜିଲାଣ୍ଡ ସହିତ ବିଜୟରୁ ଅଭିଯାନ ଆରମ୍ଭ କରିବା ଲକ୍ଷ୍ୟ ରଖିଛି।
ଅନ୍ୟପକ୍ଷରେ ବିଶ୍ବ ମାନ୍ୟତାର ୮ତମ ସ୍ଥାନରେ ଥିବା ନ୍ୟୁଜିଲାଣ୍ଡ ମଧ୍ୟ ବିଜୟ ସହ ଅଭିଯାନ ଆରମ୍ଭ କରିବାକୁ ଉଦ୍ୟମ କରିବ। ଉଭୟ ଦଳ ଶେଷ ଥର ପାଇଁ ୨୦୧୯ରେ ଆୟୋଜିତ ଏଫ୍ଆଇଏଚ୍ ଟେଷ୍ଟ ସିରିଜ୍ ଫାଇନାଲରେ ମୁହଁାମୁହିଁ ହୋଇଥିଲେ। ଏଥିରେ ଭାରତ ୫-୦ ଗୋଲରେ ନ୍ୟୁଜିଲାଣ୍ଡକୁ ପରାସ୍ତ କରିଥିଲା। ଭାରତୀୟ ପୁରୁଷ ହକି ଦଳର ଅଲିମ୍ପିକ୍ସ ଇତିହାସକୁ ଦେଖିଲେ ୮ଟି ସ୍ବର୍ଣ୍ଣ, ୧ରୌପ୍ୟ ଓ ୨ଟି କାଂସ୍ୟ ପଦକ ବିଜୟୀ ହୋଇଛି। ଦଳ ୧୯୮୦ ମସ୍କୋ ଅଲିମ୍ପିକ୍ସରେ ଶେଷ ଥର ପାଇଁ ପଦକ ବିଜୟୀ ହୋଇଥିଲା। ଦଳ ୪୧ ବର୍ଷ ପରେ ଅଲିମ୍ପିକ୍ସ ପଦକ ହାସଲ କରିବା ନେଇ ମନପ୍ରୀତ୍ ସିଂହଙ୍କ ଭାରତୀୟ ଦଳ ଆଶା ରଖିଛି।
ଅନ୍ୟପକ୍ଷରେ ଗ୍ରୁପ-ଏ ରେ ସ୍ଥାନ ପାଇଥିବା ଭାରତୀୟ ମହିଳା ଦଳ ବିଶ୍ବ ମାନ୍ୟତାର ଏକ ନମ୍ବର ସ୍ଥାନରେ ଥିବା ନେଦରଲାଣ୍ଡସ ସହିତ ଖେଳିବ। କ୍ରମାଗତ ଭାବେ ଦ୍ବିତୀୟ ଥର ଅଲିମ୍ପିକ୍ସ ଖେଳିବାକୁ ଯୋଗ୍ୟତା ହାସଲ କରିଥିବା ଭାରତ ଉକ୍ତ ଅଲିମ୍ପିକ୍ସକୁ ସ୍ମରଣୀୟ କରିବା ଲକ୍ଷ୍ୟ ରଖିଛି।
