ସାରା ଦେଶରେ ୧ ହଜାର ୫୦୦ଟି ଅଧିକ ପିଏସଏ ଅମ୍ଳଜାନ ପ୍ଲାଣ୍ଟ କାର୍ଯ୍ୟକ୍ଷମ ହେବ ବୋଲି ସୂଚନା ମିଳିଛି। ଆଜି ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଜୀବନ ରକ୍ଷାକାରୀ ଅମ୍ଳଜାନର ବୃଦ୍ଧି ଏବଂ ଉପଲବ୍ଧତାର ସମୀକ୍ଷା କରିଛନ୍ତି। ପ୍ରଧାନମନ୍ତ୍ରୀଙ୍କ କାର୍ଯ୍ୟାଳୟ ଏକ ବିବୃତ୍ତିରେ କହିଛି ଯେ ଏହି ପ୍ଲାଣ୍ଟଗୁଡିକୁ ଶୀଘ୍ର କାର୍ଯ୍ୟକ୍ଷମ କରିବାକୁ ମୋଦୀ ଅଧିକାରୀମାନଙ୍କୁ କହିଛନ୍ତି ଏବଂ ଏ ବାବଦରେ ରାଜ୍ୟ ସରକାରଙ୍କ ସହ ଘନିଷ୍ଠ ଭାବରେ କାର୍ଯ୍ୟ କରିବାକୁ ମଧ୍ୟ କହିଛନ୍ତି।
ଏହି ଅମ୍ଳଜାନ ପ୍ଲାଣ୍ଟଗୁଡ଼ିକ ପିଏମ କେୟାର୍ସ ପାଣ୍ଠି ତଥା ବିଭିନ୍ନ ମନ୍ତ୍ରଣାଳୟ ଏବଂ ସରକାରୀ ଉଦ୍ୟୋଗଗୁଡିକର ସହାୟତାରେ ନିର୍ମାଣ କରାଯାଉଛି। ପିଏମ କେୟାର୍ସ ପାଣ୍ଠିରୁ ଦିଆଯାଇଥିବା ସହାୟତାରେ ଦେଶର ସମସ୍ତ ରାଜ୍ୟ ଓ ଜିଲ୍ଲାରେ ଅମ୍ଳଜାନ ପ୍ଲାଣ୍ଟ ସ୍ଥାପନ କରାଯାଉଛି ଏବଂ ପ୍ରଧାନମନ୍ତ୍ରୀଙ୍କୁ ଦିଆଯାଇଥିବା ସୂଚନା ଅନୁଯାୟୀ, ଅମ୍ଳଜାନ ପ୍ଲାଣ୍ଟ କାର୍ଯ୍ୟକ୍ଷମ ହେଲେ ୪ ଲକ୍ଷରୁ ଅଧିକ ଅମ୍ଳଜାନ ଯୁକ୍ତ ଶଯ୍ୟା ମଧ୍ୟ କାର୍ଯ୍ୟକ୍ଷମ ହୋଇପାରିବ। ଅନ୍ୟପକ୍ଷରେ ଅମ୍ଳଜାନ ପ୍ଲାଣ୍ଟର ପରିଚାଳନା ତଥା ରକ୍ଷଣାବେକ୍ଷଣ ପାଇଁ ଡାକ୍ତରଖାନା କର୍ମଚାରୀଙ୍କୁ ପର୍ଯ୍ୟାପ୍ତ ତାଲିମ ଦେବା ବିଷୟ ନିଶ୍ଚିତ କରିବାକୁ ପ୍ରଧାନମନ୍ତ୍ରୀ କହିଛନ୍ତି। ପ୍ରତ୍ୟେକ ଜିଲ୍ଲାରେ କର୍ମଚାରୀଙ୍କୁ ତାଲିମ ଦିଆଯିବା ନିଶ୍ଚିତ କରିବାକୁ ସେ ଅଧିକାରୀମାନଙ୍କୁ ନିର୍ଦ୍ଦେଶ ଦେଇଛନ୍ତି। ସାରା ଦେଶରେ ପ୍ରାୟ ୮ ହଜାର ଲୋକଙ୍କୁ ଏ ନେଇ ତାଲିମ ଦିଆଯିବ ଓ ଏଥିପାଇଁ ବିଶେଷଜ୍ଞଙ୍କ ଦ୍ୱାରା ପ୍ରସ୍ତୁତ ଏକ ଟ୍ରେନିଂ ମଡ୍ୟୁଲ୍ ରହିଥିବା ସୂଚନା ମିଳିଛି।
