ଭୁବନେଶ୍ବର: ମହାପ୍ରଭୁ ଶ୍ରୀଲିଙ୍ଗରାଜଙ୍କ ପ୍ରସିଦ୍ଧ ରୁକୁଣା ରଥଯାତ୍ରା ପାରମ୍ପରିକ ରୀତିନୀତିରେ ଆରମ୍ଭ ହୋଇଛି। ଆଜ୍ଞାମାଳ ଆସିବା ପରେ ପ୍ରଭୁ ଶ୍ରୀଲିଙ୍ଗରାଜ ରଥାରୁଢ଼ ହୋଇଥିଲେ। ରଥରେ ଶ୍ରୀଲିଙ୍ଗରାଜ, ରୁକୁଣା ଓ ଦୋଳଗୋବିନ୍ଦ ବିଜେ କରି ଶ୍ରଦ୍ଧାଳୁଙ୍କୁ ଦର୍ଶନ ଦେଉଛନ୍ତି। ଯଦିଓ ବିନା ଶ୍ରଦ୍ଧାଳୁରେ ରଥ ଟଣା ହେଉଛି ଏବଂ ରଥଦାଣ୍ଡରେ ୧୪୪ ଧାରା ଜାରି ହୋଇଛି, କିନ୍ତୁ ରୁକୁଣା ରଥ ଯାଉଥିବା ଉଭୟ ପାର୍ଶ୍ବରେ ବହୁ ଶ୍ରଦ୍ଧାଳୁ ଶ୍ରୀଜୀଉଙ୍କୁ ଦର୍ଶନ କରୁଛନ୍ତି। ରଥଦାଣ୍ଡରେ ଶ୍ରୀଜୀଉଙ୍କ ରୁକୁଣା ରଥ ଗଡୁଥିବାବେଳେ ଶ୍ରଦ୍ଧାଳୁଙ୍କ ହରିବୋଲ, ହୁଳହୁଳି ଓ ହରହର୍ ମହାଦେବ ଧ୍ବନୀରେ ମୁଖରିତ ହେଉଥିଲା।
ଆଜି ସମସ୍ତ କୋଭିଡ କଟକଣା ଭିତରେ ରଥଟଣା ଆରମ୍ଭ ହୋଇସାରିଛି। ଆଜି ମହାପ୍ରଭୁ ଶ୍ରୀଲିଙ୍ଗରାଜଙ୍କ ରୁକୁଣା ରଥ ରଥଦାଣ୍ଡରୁ ଗଡିବା ଆରମ୍ଭ ହୋଇଛି। ରୁକୁଣା ରଥ ଲିଙ୍ଗରାଜ ମନ୍ଦିରରୁ ଆସି ମାଉସୀ ମା’ ତଥା ରାମେଶ୍ବର ମନ୍ଦିରରେ ପହଞ୍ଚିବ। କରୋନା ମହାମାରୀ ସଂକ୍ରମଣ ଆଶଙ୍କାରେ ଭୁବନେଶ୍ବର ମହାନଗର ନିଗମ(ବିଏମ୍ସି) ପକ୍ଷରୁ ରଥଖଳାରୁ ମାଉସୀ ମା’ ତଥା ରାମେଶ୍ବର ମନ୍ଦିର ପର୍ଯ୍ୟନ୍ତ ୧୪୪ ଧାରା ଜାରି କରାଯାଇଛି। ଏହାସହିତ ଏଥର ମହାପ୍ରଭୁ ଶ୍ରୀଲିଙ୍ଗରାଜଙ୍କ ରୁକୁଣା ରଥଯାତ୍ରାରେ ଭକ୍ତମାନଙ୍କୁ ସାମିଲ କରାଯାଇ ନାହିଁ। ରଥଦାଣ୍ଡରୁ ରାମେଶ୍ବର ମନ୍ଦିର ପର୍ଯ୍ୟନ୍ତ ଆସୁଥିବା ରୁକୁଣା ରଥ ରାସ୍ତାକୁ ସମ୍ପୂର୍ଣ୍ଣ ଭାବେ ସିଲ୍ କରିଦିଆଯାଇଛି। ଅପରପକ୍ଷରେ ରୁକୁଣା ରଥ ଟାଣିବା ଯେତିକି ସେବାୟତଙ୍କୁ ଅନୁମତି ମିଳିଛି ସେମାନଙ୍କର କୋଭିଡ୍ ଟେଷ୍ଟ କରାଯାଇଛି। ଯେଉଁ ସେବାୟତମାନଙ୍କ କୋଭିଡ୍ ଟେଷ୍ଟ ନେଗେଟିଭ୍ ଆସିଛି ସେମାନଙ୍କୁ ରଥ ଟାଣିବା ପାଇଁ ଅନୁମତି ମିଳିଛି। ଏଥର ଶ୍ରୀଲିଙ୍ଗରାଜଙ୍କ ସେବାୟତ ଓ ପୁଲିସ କର୍ମଚାରୀମାନେ ରଥକୁ ଟାଣୁଛନ୍ତି। ମାଉସୀ ମା’ ମନ୍ଦିରରେ ରୁକୁଣା ରଥ ସାଢେ ୭ ଟା ସୁଦ୍ଧା ପହଞ୍ଚିବା ପାଇଁ କମିଶନରେଟ୍ ପୁଲିସ ପକ୍ଷରୁ ସମୟ ଧାର୍ଯ୍ୟ କରାଯାଇଛି। ପୁଲିସ କମିଶନର ସୌମେନ୍ଦ୍ର ପ୍ରିୟଦର୍ଶୀ ଓ ଭୁବନେଶ୍ୱର ଡିସିପି ଉମାଶଂକର ଦାଶଙ୍କ ସମେତ ବହୁ ବରିଷ୍ଠ ପୁଲିସ ଅଧିକାରୀଙ୍କ ମିଳିତ ଉଦ୍ୟମରେ ରୁକୁଣା ରଥ ଯାତ୍ରା ସମ୍ପନ୍ନ ହେଉଛି।
