ନୂଆଦିଲ୍ଲୀ: ଡ୍ରଗ୍ସ ଚୋରା ଚାଲାଣ ପାଇଁ ଚାଲାଣକାରୀମାନେ ବିଭିନ୍ନ ପନ୍ଥା ଆପଣାଇ ଥାଆନ୍ତି। ସେମାନଙ୍କର ବେଆଇନ ସାମଗ୍ରୀକୁ ଗନ୍ତବ୍ୟ ସ୍ଥଳରେ ପହଞ୍ଚାଇବା ଭିନ୍ନ ତଥା ଅଦ୍ଭୁତ ମାଧ୍ୟମର ସାହାଯ୍ୟ ନେଇଥାଆନ୍ତି। ଏଭଳି ଏକ ଘଟଣା ସାମ୍ନାକୁ ଆସିଛି ପାନାମାର ନୁଏଭା ଏସ୍ପରେଞ୍ଜା ଜେଲ୍ରୁ। ଏହି ଜେଲ୍କୁ ଡ୍ରଗ୍ସ ଚାଲାଣ କରୁଥିଲା ଏକ ବିଲେଇ, ଯାହାକୁ ଧରିଛି ସେଠାକାର ପୁଲିସ।
ସୂଚନା ଅନୁସାରେ, ବିଲେଇର ବେକରେ ବିଭିନ୍ନ ପ୍ରକାରର ଡ୍ରଗ୍ସ ବନ୍ଧା ହୋଇଥିଲା ଏବଂ ବିଲେଇ ଜେଲ୍ ଭିତରକୁ ପସିବାକୁ ଚେଷ୍ଟା କରୁଥିଲା। ଏହି ସମୟରେ ସେଠାକାର ଜଣେ ଅଧିକାରୀଙ୍କୁ ତାକୁ ଦେଖିଥିଲେ। ଏହାପରେ ବିଲେଇକୁ ଧରି ତାଠାରୁ ସମସ୍ତ ଡ୍ରଗ୍ସକୁ ପୁଲିସ ଜବତ କରିଥିଲା। ଏହାସହିତ ବିଲେଇଟିକୁ ଗୃହପାଳିତ ପଶୁ କେନ୍ଦ୍ରକୁ ପଠାଇ ଦିଆଯାଇଛି।
ଜେଲ୍ ଅଧିକାରୀଙ୍କ କହିବାନୁସାରେ ପୂର୍ବରୁ ମଧ୍ୟ ଏଭଳି ବହୁତ ଥର ହୋଇଛି। ପଶୁ ପକ୍ଷୀମାନଙ୍କ ଜରିଆରେ ଜେଲ ଭିତରକୁ ଡ୍ରଗ୍ସ ଚାଲାଣ ଉଦ୍ୟମ ହୋଇଛି। ତାଙ୍କ କହିବାନୁସାରେ ପଶୁମାନଙ୍କ ଶରୀରରେ ଡ୍ରଗ୍ସ ବାନ୍ଧି ଭିତରକୁ ପଠାଇଦେବା ପରେ କଏଦୀମାନେ ଖାଦ୍ୟ ଲାଳସା ଦେଇ ତାକୁ ନିଜ ପାଖକୁ ଡାକିଥାଆନ୍ତି।
