ନୂଆଦିଲ୍ଲୀ : ନିର୍ବାଚନ କମିଶନ୍ ଦେଶରେ ଅବାଧ ଓ ନିରପେକ୍ଷ ନିର୍ବାଚନ କରାଇବାକୁ ବଦ୍ଧପରିକର ବୋଲି ମୁଖ୍ୟ ନିର୍ବାଚନ କମିଶନର ସୁନୀଲ ଅରୋରା କହିଛନ୍ତି। ନିର୍ବାଚନ ସମୟରେ କୋବିଡ୍ର ସମସ୍ତ ନିୟମର କଡ଼ାକଡ଼ି ପାଳନ କରାଯିବ। ତାମିଲନାଡୁ ନିର୍ବାଚନ ପ୍ରସ୍ତୁତିର ସମୀକ୍ଷା କରିସାରି ଚେନ୍ନାଇରେ ସାମ୍ବାଦିକମାନଙ୍କ ସହ କଥାବାର୍ତ୍ତା ବେଳେ ସେ କହିଛନ୍ତି,
ରାଜନୈତିକ ଦଳଗୁଡ଼ିକର ସମସ୍ତ ଅନୁରୋଧ ଓ ନିବେଦନକୁ ବିଚାରକୁ ନିଆଯାଇଛି ଓ ପ୍ରସ୍ତୁତିର ପୁଙ୍ଖାନୁପୁଙ୍ଖ ସମୀକ୍ଷା କରାଯାଇଛି। କିଛି ରାଜନୈତିକ ଦଳ ମତଦାନର ଦିନେ ଦୁଇଦିନ ମଧ୍ୟରେ ଭୋଟ ଗଣତି ପାଇଁ ମତ ଦେଇଛନ୍ତି। ସେ କହିଛନ୍ତି, ଯେହେତୁ ଅଧିକ ରାଜ୍ୟରେ ନିର୍ବାଚନ କରାଯାଉଛି ସେ ଦୃଷ୍ଟିରୁ ଭୋଟ ଗଣତି ଏକ ସଙ୍ଗରେ ହେବ।
ଶ୍ରୀ ଅରୋରା କହିଛନ୍ତି, ନିର୍ବାଚନ ପାଇଁ ଅଧିକ ସଂଖ୍ୟକ କେନ୍ଦ୍ରୀୟ ସଶସ୍ତ୍ର ପୋଲିସ୍ ବାହିନୀ ଯବାନ ମୁତୟନ ହେବେ। ନିର୍ବାଚନ ଖର୍ଚ୍ଚର ତଦାରଖ ପାଇଁ ଅନ୍ୟ ରାଜ୍ୟଗୁଡ଼ିକରୁ ସ୍ୱତନ୍ତ୍ର ପର୍ଯ୍ୟବେକ୍ଷକମାନଙ୍କୁ ନିଯୁକ୍ତ କରାଯିବ। ସେ କହିଛନ୍ତି, ନିର୍ବାଚନ କମିଶନ୍ ଶାରିରୀକ ଦୂରତା ନିୟମକୁ ବିଚାରକୁ ନେଇ ଭୋଟ ଗ୍ରହଣର ସମୟକୁ ଏକ ଘଣ୍ଟା ବୃଦ୍ଧି କରିଛି। ବିଧାନସଭା ନିର୍ବାଚନରେ ବହୁ ସଂଖ୍ୟାରେ ଭୋଟରମାନେ ଆସି ମତଦାନ କରିବାକୁ କମିଶନ୍ ଆଶା କରୁଛି। ସେ କହିଛନ୍ତି, ଅନ୍ୟ ରାଜ୍ୟ ଗୁଡ଼ିକର ନିର୍ବାଚନ ପ୍ରସ୍ତୁତିର ସୀମକ୍ଷା କରାଯିବା ପରେ ଭୋଟ ଗ୍ରହଣ ତାରିଖ ଗୁଡ଼ିକ ବିଷୟରେ ଘୋଷଣା କରାଯିବ।
ସେ କହିଛନ୍ତି, କୋବିଡ୍ କଟକଣା ଦୃଷ୍ଟିରୁ ଆଉ ଅତିରିକ୍ତ ୨୫ ହଜାର ଭୋଟ ଗ୍ରହଣ କେନ୍ଦ୍ର ସ୍ଥାପନ କରାଯିବ। ଏହା
ଯୋଗୁଁ ରାଜ୍ୟର ଭୋଟ ଗ୍ରହଣ କେନ୍ଦ୍ର ଗୁଡ଼ିକର ସଂଖ୍ୟା ୯୩ହଜାରକୁ ବୃଦ୍ଧି ପାଇବ। ନିର୍ବାଚନ କମିଶନ୍ ରାଜ୍ୟ ଅବକାରୀ ବିଭାଗର କାର୍ଯ୍ୟକଳାପ ଉପରେ ଅସନ୍ତୋଷ ପ୍ରକାଶ କରିଥିବାର ସେ ଜଣାଇଛନ୍ତି। ଅନ୍ୟ ଏକ ପ୍ରଶ୍ନର ଉତ୍ତର ଦେବାକୁ ଯାଇ ଶ୍ରୀ ଅରୋରା କହିଛନ୍ତି, ନିର୍ବାଚନ ତାରିଖ ଘୋଷଣା କରାଯିବା ସମୟରେ ସ୍କୁଲ କଲେଜ୍ ଗୁଡ଼ିକର ପରୀକ୍ଷା ଏବଂ
ପର୍ବ ପର୍ବାଣି ଗୁଡ଼ିକୁ ବିଚାରକୁ ନିଆଯିବ।
