ଇସଲାମାବାଦ: ପାକିସ୍ତାନ ଏବଂ ଚୀନ ଭାରତରେ ଅଶାନ୍ତି ସୃଷ୍ଟି କରିବା ଲାଗି ବିଭିନ୍ନ ପ୍ରକାର ଷଡ଼ଯନ୍ତ୍ର କରିଆସୁଛନ୍ତି। ଏଭଳି ସ୍ଥିତିରେ ପାକିସ୍ତାନୀ ସେନାର ଜଣେ ଜେନେରାଲ ଚାଞ୍ଚଲ୍ୟକର ମନ୍ତବ୍ୟ ଦେଇଛନ୍ତି। ପାକିସ୍ତାନରେ ବେଲୁଚ ସ୍ବାଧୀନତା ଆନ୍ଦୋଳନକୁ ଚୀନ ଭଣ୍ଡୁର କରିବା ଲାଗି ଉଦ୍ୟମ ଚଳାଇଥିବା ସେ ସ୍ବୀକାର କରିଛନ୍ତି। ବେଲୁଚ ଲୋକମାନଙ୍କ ସ୍ବାଧୀନତା ସଂଗ୍ରାମ ସମାପ୍ତ କରିବା ଲାଗି ବେଜିଂ ପାକିସ୍ତାନକୁ ୬ ମାସ ସମୟ ଦେଇଛି ବୋଲି ସେ କହିଛନ୍ତି।
ବାଂଲାଦେଶୀ ଖବରକାଗଜ ଦ ଡେଲି ସନ୍ ଏକ ରିପୋର୍ଟରେ ଏ ନେଇ ରିପୋର୍ଟ ପ୍ରକାଶ ପାଇଛି। ସେଥିରେ ପାକିସ୍ତାନୀ ସେନାର ଜେନେରାଲ ଅୟମାନ ବିଲାଲଙ୍କ ମନ୍ତବ୍ୟରେ ଦର୍ଶାଯାଇଛି ଯେ, ବେଜିଂ ପକ୍ଷରୁ ପାକିସ୍ତାନୀ ସେନାକୁ ବେଲୁଚ ଆନ୍ଦୋଳନକୁ ଭଣ୍ଡୁର କରିବା କାର୍ଯ୍ୟ ଦିଆଯାଇଛି। ଏହି କାର୍ଯ୍ୟ ତାଙ୍କୁ (ଜେନେରାଲ) ପ୍ରଦାନ କରାଯାଇଛି। ତାଙ୍କୁ ୬ ମାସ ସମୟ ଦିଆଯିବା ସହିତ ସେଠାରେ ମୁତୟନ କରାଯାଇଛି। ଇରାନକୁ ପାକିସ୍ତାନର ସବୁଠୁ ବଡ଼ ଶତ୍ରୁ ଦର୍ଶାଇ ବିଲାଲ କହିଛନ୍ତି, ପାକ୍ ସେନା ଇରାନରେ ପ୍ରବେଶ କରିବ ଏବଂ ଇରାନ ବିରୋଧରେ କାର୍ଯ୍ୟାନୁଷ୍ଠାନ ନେବ।
ବିଲାଲ ଆହୁର କହିଛନ୍ତି, ଚୀନ ପକ୍ଷରୁ ତାଙ୍କୁ ଭଲ ବେତନ ସହିତ ବଡ଼ ଅଙ୍କର ଅର୍ଥ ପ୍ରଦାନ କରିଛି। ଆଞ୍ଚଳିତ ହିତ ପାଇଁ ଏବଂ ଚୀନ ପାକିସ୍ତାନ ଆର୍ଥିକ କରିଡର (ସିପିଇସି) ବିରୋଧରେ ଇରାନର ଷଡ଼ଯନ୍ତ୍ରକୁ ବିଫଳ କରିବା ସହିତ ଏହି ଅଞ୍ଚଳରେ ଭାରତ ବଢୁଥିବା ପ୍ରଭାବକୁ ରୋକିବା ପାଇଁ ତାଙ୍କୁ ମୁତୟନ କରାଯାଇଛି। ଆଞ୍ଚଳିକ ହିତ ପାଇଁ ଏହା ଏକ ପ୍ରକାର ନିବେଶ ବୋଲି ସେ କହିଛନ୍ତି।
