ବରପାଲି : ବରପାଲି ବ୍ଲକ ଚିର ମରୁଡି ପ୍ରପଡ଼ିତ ଅଞ୍ଚଳରେ ରାଜ୍ୟ ସରକାରଙ୍କ ଦ୍ୱାରା ଉଠା ଜଳାସଚନ ମାଧ୍ୟମରେ ୧୦୦ ଏକର ଚାଷଜମିରେ କେନାଲ ପାଣି ପହଞ୍ଚାଇବାର ପ୍ରକଳ୍ପ କାମ ଆରମ୍ଭ ହେବ ଜଣାପଡ଼ିଛି। ଖବରଟି ଜଣାପଡ଼ିଲାପରେ ସ୍ଥାନିୟ ବୀର ବଜରଙ୍ଗବଲୀ ପାଣିପଞ୍ଚାୟତ ପକ୍ଷରୁ ଏକ ଆଲୋଚନା ବେଠକର ଆୟୋଜନ କରାଯାଇଥିଲା। କାର୍ଯ୍ୟକ୍ରମକୁ ମୂଖ୍ୟଅତିଥି ରୂପେ ବରପାଲି ବ୍ଲକ ଅଧ୍ୟକ୍ଷ କିଶୋର ଦଫାଦାର ଯୋଗ ଦେଇ ଉଦଘାଟନ କରିଥିଲେ। ପଞ୍ଚାୟତ ବରିଷ୍ଠ ସଦସ୍ୟ ଗଣେଷ ବେହେରାଙ୍କ ଅଧ୍ୟକ୍ଷତାରେ ସଭାକାର୍ଯ୍ୟି ପରିଚାଳିତ ହୋଇଥିଲା। ଚାଷୀ କୂଳ ବହୁ ଦିନର ଆଶା ସାକାର ହେବାକୁ ଯାଉଥିବାରୁ ସଦସ୍ୟ ମାନେ ମିଳିତ ଭାବରେ ରାଜ୍ୟ ସରକାରଙ୍କୁ କୃତଜ୍ଞତା ଜଣାଇଥିଲେ।
ମୂଖ୍ୟଅତିଥି ଦଫାଦାର ସରକାରଙ୍କ ଦ୍ୱାରା କାର୍ଯ୍ୟକାରୀ ହେବାକୁଥିବା ଜଳସେଚନ ପ୍ରକଳ୍ପ ଅଞ୍ଚଳର ୧୦୦ ଏକର ଚାଷଜମି ନିଶ୍ଚିତ ଭାବରେ ଜଳସେଚିତ ହୋଇପାରିବ ବୋଲି କହିଥିଲେ। ଆଗାମୀ ଦିନରେ ଆମକୁ ପାଣି ପାଇଁ ସମସ୍ୟା ଭୋଗିବାକୁ ପଡ଼ିବ ନାହିଁ ଆପଣମାନଙ୍କ ବହୁଦିନର ଆଶା ଓ ପରିଶ୍ରମ ସାର୍ଥକ ହେବାକୁ ଯାଉଛି ଚାଷୀ ମୁହଁରେ ହସ ଝଲସିବ ବୋଲି କହିଥିଲେ। ଚାଷୀ ଓ ଚାଷ କାର୍ଯ୍ୟରେ କୃଷି ବିଭାଗୀୟ କର୍ମକର୍ତ୍ତା ମାନଙ୍କ ଅସ୍ହଯୋଗ କାର୍ଯ୍ୟକଳାପକୁ ନେଇ ଆଲୋଚନା ହୋଇଥିଲା। ସଭାରେ ଉପସ୍ଥିତ ସଦସ୍ୟ ମାନେ ଜଳସେଚନ ବ୍ୟବସ୍ଥାର ଉଚିତ ପରିଚାଳନା ଓ ପାଣିର ସଠିକ ସ୍ରୋତ ପହଞ୍ଚିବା ସମ୍ପର୍କରେ ବିଭିନ୍ନ ପ୍ରଶ୍ନ ମାନ ପଚାରି ବୁଝିଥିଲେ। ଏହି ଅବସରରେ ପାଣି ପଞ୍ଚାୟତ କାର୍ଯ୍ୟକ୍ରମର ସୂଚାରୁ ପରିଚାଳନା ନିମନ୍ତେ ଏକ ଅସ୍ଥାୟୀ କମିଟି ଗଠନ କରାଯାଇଥିଲା। କମିଟିରେ ସଭାପତି ପରମେଶ୍ୱର ବେହେରା,ସଂପାଦକ ସୁଦାମ ବେହେରା, କୋଷାଧ୍ୟକ୍ଷ ଅନ୍ତ ବେହେରାଙ୍କ ସମେତ ଅନ୍ୟ ସମସ୍ତ ୬୦ଜଣ ସଦସ୍ୟ ସ୍ଥାୟୀ ସଭ୍ୟ ରହିଥିଲେ। ପରେ ସୁଦର୍ଶନ ବେହେରା ଧନ୍ୟବାଦ ଅର୍ପଣ କରିଥିଲେ।
