ନୂଆଦିଲ୍ଲୀ :କରୋନା ମହାମାରୀ ସମାଜର ସମସ୍ତ ବର୍ଗର ଲୋକଙ୍କ ଜୀବନ ଏବଂ ଅର୍ଥନୀତି ଉପରେ ଗୁରୁତର ପ୍ରଭାବ ପକାଇଛି | ନିମ୍ନ ଶିଳ୍ପ ଆୟ ବର୍ଗର ଲୋକମାନେ ଚାକିରି ହରାଇବା ଏବଂ ବିଭିନ୍ନ ଶିଳ୍ପରେ ଦରମା ହ୍ରାସ ଯୋଗୁଁ ଅଧିକ ପ୍ରଭାବିତ ହୋଇଛନ୍ତି | ମହାମାରୀ ଋଣ ଏବଂ ଋଣ ସମ୍ବନ୍ଧୀୟ ପ୍ରାଥମିକତାକୁ ବଦଳାଇ ଦେଇଛି | ୟୁରୋପ ଏବଂ ଏସିଆରେ କାର୍ଯ୍ୟ କରୁଥିବା ଆନ୍ତର୍ଜାତୀୟ ଗ୍ରାହକ ଅର୍ଥ ସେବା ପ୍ରଦାନକାରୀ କମ୍ପାନୀ ହୋମ କ୍ରେଡିଟ୍ ପକ୍ଷରୁ ପ୍ରକାଶିତ ରିପୋର୍ଟରେ ଏହା ପ୍ରତିଫଳିତ ହୋଇଛି ।
ହୋମ କ୍ରେଡ଼ିଟ୍ ରିପୋର୍ଟ ଅନୁସାରେ ଭାରତରେ ପରିବାରର ଆବଶ୍ୟକତା ପୂରଣ ପାଇଁ ୪୬% ଲୋକ କରଜ କରିଛନ୍ତି । ଦରମା କମିବା, ଦରମାରେ ବିଳମ୍ବ ହେବା ଏହାର ପ୍ରମୁଖ କାରଣ ବୋଲି କୁହାଯାଇଛି । ଏପରିକି ପୁରୁଣା ଋଣ ପରିଶୋଧ ପାଇଁ ମଧ୍ୟ ଲୋକମାନେ ନୂଆ କରଜ କରିଛନ୍ତି ।
ଏହି ଅଧ୍ୟୟନ ଅନୁସାରେ ଚାକିରି ହରାଇବା ଯୋଗୁଁ ୧୪% ଲୋକ କରଜ ନେବାକୁ ବାଧ୍ୟ ହୋଇଛନ୍ତି । ଅନୁରୂପ ଭାବରେ ପରିବାର ସଦସ୍ୟଙ୍କ ଆବଶ୍ୟକତା ପୂରଣ ପାଇଁ ୨୩% ଲୋକ ଋଣ କରିଛନ୍ତି । ଘର ନିମନ୍ତେ ଆବଶ୍ୟକୀୟ ଟିଭି, ଫ୍ରିଜ, ଫୋନ୍ ପରି ସାମଗ୍ରୀ କିଣିବା ପାଇଁ ୩୩% ଲୋକ ଋଣ କରିଥିବା ସୂଚନା ମିଳିଛି ।
ଅଧିକାଂଶ କ୍ଷେତ୍ରରେ ଲୋକମାନେ ନିଜ ବନ୍ଧୁ, ପରିଚିତ ବ୍ୟକ୍ତିଙ୍କଠାରୁ କରଜ କରିଛନ୍ତି । ୨୭% ଲୋକ ନିଜର ସମ୍ପର୍କୀୟ ଓ ବନ୍ଧୁମାନଙ୍କଠାରୁ କରଜ କରିଥିବା ଜଣାପଡ଼ିଛି । ମୁମ୍ବାଇ, ଭୋପାଳ, ଦିଲ୍ଲୀ, ପାଟନା ଆଦି ସହରରେ ହାରାହାରି ୨୫% ଲୋକ ନିଜର ପରିଜନଙ୍କଠାରୁ କରଜ ନେଇଥିବା ସୂଚନା ମିଳିଛି ।
ତେବେ ବିଶେଷଭାବରେ ପୁରୁଷମାନେ ମହିଳାମାନଙ୍କ ତୁଳନାରେ କରୋନା କାଳରେ ଅଧିକ କରଜ କରିଥିବା ଏଥିରେ ଦର୍ଶାଯାଇଛି । ମହିଳାମାନେ କୌଣସି ବନ୍ଧୁ ଓ ପରିଜନଙ୍କ ଅପେକ୍ଷା କୌଣସି ଆର୍ଥିକ ପ୍ରତିଷ୍ଠାନ, ବ୍ୟାଙ୍କ, ଋଣପ୍ରଦାନକାରୀ ସଂସ୍ଥାରୁ କରଜ କରିଥିବା ଜଣାପଡ଼ିଛି ବୋଲି ହୋମ କ୍ରେଡ଼ିଟ୍ ଇଣ୍ଡିଆ ରିପୋର୍ଟରେ ପ୍ରକାଶ ପାଇଛି ।
