ରାଞ୍ଚି: ବରିଷ୍ଠ ସାମ୍ବାଦିକ ତଥା ପ୍ରେସ ଟ୍ରଷ୍ଟ ଅଫ ଇଣ୍ଡିଆ(ପିଟିଆଇ)ର ଝାଡ଼ଖଣ୍ଡ ବ୍ୟୁରୋମୁଖ୍ୟ ପି.ଭି. ରାମାନୁଜମ୍ ଓରଫ ରାଜୁ(୫୫)ଙ୍କର ଗୁରୁବାର ଅକାଳ ବିୟୋଗ ଘଟିଛି। କଟକ ସହରରେ ଜନ୍ମିତ ରାଜୁ ନିଜ ସହରରେ ଉଚ୍ଚ ଶିକ୍ଷା ଲାଭ କରିବା ପରେ ସମ୍ବାଦ ସରବରାହ ସଂସ୍ଥା ପିଟିଆଇରେ ଦୀର୍ଘ ୨୫ବର୍ଷରୁ ଊର୍ଦ୍ଧ୍ବ ସମୟଧରି କାର୍ୟ୍ୟ କରିଆସୁଥିଲେ। ପୂର୍ବରୁ ସେ ଦିଲ୍ଲୀ ଏବଂ କଲକାତାରେ କାର୍ୟ୍ୟ କରିବା ପରେ ୨୦୦୨ରେ ଝାଡ଼ଖଣ୍ଡକୁ ବ୍ୟୁରୋମୁଖ୍ୟଭାବେ ବଦଳି ହୋଇ ଆସି ରାଞ୍ଚିରେ କାର୍ୟ୍ୟ କରୁଥିଲେ। ମୃତ୍ୟୁ ଶଯ୍ୟା ନିକଟରେ ପତ୍ନୀ ଉପସ୍ଥିତ ଥିଲେ। ତାଙ୍କର ଏକମାତ୍ର ପୁଅ ଭୁବନେଶ୍ୱରରେ ରହି ପାଠ ପଢୁଛନ୍ତି। ରାମାନୁଜମ୍ଙ୍କ ବିୟୋଗରେ ଝାଡ଼ଖଣ୍ଡ ମୁଖ୍ୟମନ୍ତ୍ରୀ ହେମନ୍ତ ସୋରେନ, କେନ୍ଦ୍ର ଆଦିବାସୀ ବ୍ୟାପାର ମନ୍ତ୍ରୀ ଅର୍ଜୁନ ମୁଣ୍ଡାଙ୍କ ସହିତ ଭୁବନେଶ୍ୱରର ପୂର୍ବତନ ପିଟିଆଇ ମୁଖ୍ୟ ଶରତଚନ୍ଦ୍ର ଦାସ, ପରେଶ ଦାସ, ‘ସମାଜ’ର କାର୍ୟ୍ୟକାରୀ ସମ୍ପାଦକ ସୁଶାନ୍ତ ମହାନ୍ତି ପ୍ରମୁଖ ଗଭୀର ଶୋକପ୍ରକାଶ କରିବା ସହିତ ଶୋକସନ୍ତପ୍ତ ପରିବାରପ୍ରତି ସମବେଦନା ଜଣାଇଛନ୍ତି। ଆସନ୍ତାକାଲି ତାଙ୍କର ଶେଷକୃତ୍ୟ ସମ୍ପନ୍ନ ହେବ ବୋଲି ପରିବାର ସୂତ୍ରରୁ ଜଣାପଡ଼ିଛି।
Comments are closed.