କଟକ : ସପ୍ତାହର ପ୍ରତି ବୁଧବାର ବନ୍ଦ ରହିବ କଟକ ମାଲଗୋଦାମ । ମାଲଗୋଦାମ ଅଞ୍ଚଳରେ କରୋନା ସଂକ୍ରମିତଙ୍କ ସଂଖ୍ୟା ବଢୁଥିବାରୁ ଏହି ନିଷ୍ପତ୍ତି ନେଇଛି କଟକ ମହାନଗର ନିଗମ କର୍ତ୍ତୃପକ୍ଷ । ଏହାସହ ମାଲଗୋଦାମ ତିନିଟି ପର୍ଯ୍ୟାୟରେ ଖୋଲିବା ପାଇଁ ମଧ୍ୟ ନିଷ୍ପତ୍ତି ନେଇଛି ସିଏମସି ।
ଅତ୍ୟାବଶ୍ୟକ ସାମଗ୍ରୀ ବିକ୍ରୀ କରୁଥିବା ହୋଲସେଲର୍ ସକାଳ ୧୦ଟାରୁ ଅପରାହ୍ଣ ୨ଟା ଯାଏଁ ଖୋଲିବ । ଅଣଅତ୍ୟାବଶ୍ୟକ ଦୋକାନଗୁଡ଼ିକ ସକାଳ ୭ଟାରୁ ୧୦ଟା ଯାଏଁ ଖୋଲିବ । ଅତ୍ୟାବଶ୍ୟକ ଜିନିଷ ବିକ୍ରି କରୁଥିବା ଖୁଚୁରା ଦୋକାନଗୁଡ଼ିକ ଦିନ ୨ଟାରୁ ରାତି ୮ଟା ଯାଏଁ ଖୋଲା ରହିବ । ପରବର୍ତ୍ତୀ ନିର୍ଦ୍ଦେଶନାମା ପର୍ଯ୍ୟନ୍ତ ମାଲଗୋଦାମ ସପ୍ତାହର ପ୍ରତି ବୁଧବାର ବନ୍ଦ ରହିବ ବୋଲି ସିଏମସି ପକ୍ଷରୁ କୁହାଯାଇଛି ।
କଟକ ମାଲଗୋଦାମ୍ କଣ୍ଟେନମେଣ୍ଟ ଅଂଚଳରୁ ଗତକାଲି ୧୧୨ ଜଣ କରୋନା ସଂକ୍ରମିତ ଚିହ୍ନଟ ହେବା ପରେ ପ୍ରଶାସନ ଓ କଟକବାସୀଙ୍କୁ ଚିନ୍ତାରେ ପକାଇଛି । କିଛି ଦିନ ହେବ ମାଲଗୋଦାମ ବେହେରା ସାହି ଅଞ୍ଚଳରେ ଲଗାତର ସଂକ୍ରମଣ ବଢି ଚାଲିଥିବାରୁ ପ୍ରଶାସନ ସେସବୁ ଅଂଚଳରେ କଣ୍ଟାକ୍ଟ ଟ୍ରେସିଂ ଓ ଟେଷ୍ଟିଂକୁ ତ୍ୱରାନ୍ୱିତ କରିଛି । ଏଥି ସହିତ ବେହେରା ସାହି ଲୋକଙ୍କୁ କଣ୍ଟେନମେଣ୍ଟ ଜୋନ୍ ବାହାରକୁ ଆସି ମାଲଗୋଦାମ୍ ଅଞ୍ଚଳରେ କାମ କିମ୍ବା ବୁଲାବୁଲି ନ କରିବାକୁ ପ୍ରଶାସନ ଓ ବ୍ୟବସାୟୀ ସଂଘ ପରାମର୍ଶ ଦେଇଛି ।
