କେନ୍ଦୁଝରଗଡ଼: ଚମ୍ପୁଆ ରେଞ୍ଜର ଗୁରୁବେଡ଼ା ବୈତରଣୀ ଜଙ୍ଗଲରେ ୨ ହାତୀ ମୃତ୍ୟୁ ଘଟଣାରେ ପୁଲିସ ଆଉ ୩ ଜଣଙ୍କୁ ଗିରଫ କରିଛି । ସେମାନେ ସ୍ଥାନୀୟ ଅଞ୍ଚଳର ବାସିନ୍ଦା ଓ ସେମାନଙ୍କର ନାଁ ହେଉଛି ମାତଲୁ ମୁଣ୍ଡା, ଶ୍ରୀଧର ମୁଣ୍ଡା ଓ ଗୁରୁବେଡ଼ା । ଏହି ୩ ଜଣଙ୍କୁ ମିଶାଇ ଏହି ଘଟଣାରେ ଏଯାଏ ୫ଜଣଙ୍କୁ ଗିରଫ କରାଯାଇ ସାରିଛି । ସେହିପରେ ଜଣେ ଫରେଷ୍ଟର ଓ ଜଣେ ଫରେଷ୍ଟ ଗାର୍ଡ଼ଙ୍କୁ ସରକାର ନିଲମ୍ବିତ କରିଛନ୍ତି । ତେବେ ହାତୀଙ୍କ ମୃତ୍ୟୁ ପରେ ତସ୍କରମାନେ ଲୁଟି ନେଇଥିବା ଦାନ୍ତ ପୁଲିସ ଉଦ୍ଧାର କରିବାରେ ବ୍ୟର୍ଥ ହୋଇଛି । ତେବେ ଘଟଣାର ତଦନ୍ତ ଅବ୍ୟାହତ ରହିଛି ବୋଲି କେନ୍ଦୁଝର ଡ଼ିଏଫ୍ଓ ସନ୍ତୋଷ ଯୋଶୀ କହିଛନ୍ତି ।
ବାରହା ଶିକାର ପାଇଁ ଶନିବାର ଅଭିଯୁକ୍ତମାନେ ଜଙ୍ଗଲରେ ବିଜୁଳି ତାର ଛନ୍ଦିଥିବା ସ୍ବୀକାର କରିଛନ୍ତି । ମାତ୍ର ରବିବାର ସେମାନେ ତାର ଫିଟାଇବାକୁ ଯିବାବେଳେ ବାରହା ବଦଳରେ ଦୁଇଟି ହାତୀ ମରି ପଡ଼ିଥିବା ଦେଖିଥିଲେ । ଏହାପରେ ସେମାନେ ଭୟଭୀତ ହୋଇ ତାର ନେଇ ପଳାଇଥିଲେ । କିନ୍ତୁ ହାତୀ ଦାନ୍ତ କିଏ ନେଇଛି ସେ ସମ୍ପର୍କରେ ସେମାନେ ଜାଣି ନାହାନ୍ତି ବୋଲି କହିଛନ୍ତି ।
