ବ୍ରହ୍ମପୁର: ଗଞ୍ଜାମ ଜିଲାର ବେଗୁନିଆପଡ଼ା ବ୍ଲକ ଅଞ୍ଚଳର ଏକ ସଙ୍ଗରୋଧ କେନ୍ଦ୍ରରେ ଜଣେ ପ୍ରବାସୀ ମହିଳା ଏକ ପୁଅକୁ ଜନ୍ମ ଦେଇଛନ୍ତି । ପ୍ରସବ ସ୍ବାଭାବିକ ହୋଇଛି ଏବଂ ମା-ଛୁଆ ସୁସ୍ଥ ଅଛନ୍ତି । ନବଜାତ ଶିଶୁ ଓ ପ୍ରସୂତୀଙ୍କୁ ସ୍ବାସ୍ଥ୍ୟର ଯତ୍ନ ନେବା ନିମନ୍ତେ ବ୍ରହ୍ମପୁର ବଡ଼ ଡ଼ାକ୍ତରଖାନାକୁ ଅଣା ଯାଇଛି ।
ସୂଚନା ଅନୁସାରେ ସ୍ବାମୀଙ୍କ ସହ ସୁରତରୁ ଫେରିଥିବା ବଡ଼ଗୁଡ଼ିଆଳି ଗ୍ରାମର ସନ୍ତୋଷିନୀ ପ୍ରଧାନ ଓ ତାଙ୍କର ଦୁଇ ଝିଅ ବେଗୁନିଆପଡ଼ା ବ୍ଲକର ମର୍ଦକୋଟ ସଙ୍ଗରୋଧ କେନ୍ଦ୍ରରେ ରହିଥିଲେ । ସନ୍ତୋଷିନୀ ଗର୍ଭବତୀ ଥିଲେ ଓ ଆଜି ସକାଳେ ତାଙ୍କର ପ୍ରସବ ଯନ୍ତ୍ରଣା ହୋଇଥିଲା । ଏ ସମ୍ପର୍କରେ ସେ ନିଜ ପରିବାରକୁ ସୂଚନା ଦେଇଥିଲେ ଓ ଖବର ପାଇ ତାଙ୍କ ମା’ ସଙ୍ଗରୋଧ କେନ୍ଦ୍ର ନିକଟରେ ପହଞ୍ଚିଥିଲେ । ମାତ୍ର ସଙ୍ଗରୋଧ କେନ୍ଦ୍ର ପରିସରକୁ କାହାରିକୁ ଯିବାକୁ ବାରଣ କରାଯାଇଥିବାରୁ ସେ ପ୍ରବେଶ କରି ପାରି ନ ଥିଲେ । ମାତ୍ର ସନ୍ତୋଷିନୀଙ୍କ ପ୍ରସବ ଯନ୍ତ୍ରଣା ଅଧିକ ହେବାରୁ ବାଧ୍ୟ ହୋଇ ତାଙ୍କ ମା’ଙ୍କୁ ଭିତରକୁ ଡ଼କାଯାଇଥିଲା । ଶେଷରେ ସନ୍ତୋଷିନୀ ଏକ ପୁଅକୁ ଜନ୍ମ ଦେଇଥିଲେ ।
ଏହି ସମୟରେ ବେଗୁନିଆପଡ଼ା ଡ଼ାକ୍ତର, ନୋଡ଼ାଲ ଅଧିକାରୀ, ସଙ୍ଗରୋଧ କେନ୍ଦ୍ରର ଭାରପ୍ରାପ୍ତ ଅଧିକାରୀ ଓ ଅନ୍ୟମାନେ ଉପସ୍ଥିତ ଥିଲେ ।
